Jolserik Lıana

Astana men Qaraǵandynyń arasyna qatynaıtyn «Saryarqa» elektr poıyzy jolaýshy qaýy­myna jasalǵan táýir syıdyń biri boldy. Bul poıyzdyń, aıta berseń, artyqshylyǵy kóp. Jo­laýshylar úshin barlyq jaǵ­daı qarastyrylǵan: jumsaq oryn­dyqtar, zamanaýı aýa bap­taǵysh júıesi, tegin Wi-Fi qyzmeti, eki tilde aqparat beretin júgirtpe jol... «Qala mańyndaǵy tasymal» AQ-tyń Qaraǵandy ýchaskesine tıesili bul elektr poıyzynda aǵa jolserik bolyp qyzmet ete­tin Lıana Sabırova syndy shy­raıly qaryndasty bul kúnde jolaýshylardyń kóbi tanyp alǵan. Qashanda jyly jymıyp, aınalasyna nur shashyp júretin ıbaly qyz ózi jumys istegen úsh jyldyń ishinde ujymǵa tas­taı batyp, sýdaı sińgen eken. Jo­laýshylardyń da kózaıymyna aınalyp, kórmese izdeıtin qımas janyndaı bolyp ketken... О́mir shirkinniń kútpegen jerden usynar tosyn syıy taý­­sylǵan ba?! Jolserik bolý Lıana qaryndastyń úsh uıyqtasa túsine de kirmegen mamandyq­tyń túri edi. Joǵary oqý ornyn «Kom­pıýter baǵdarlamashysy» mamandyǵy boıynsha támamdady. Qolynda kúrekteı dıplomy bolsa da daıyn turǵan jumys joq, biraz ýaqyt úıde otyryp qalǵany da ras-tyn. О́zi úıdegi balalardyń úlkeni edi. Arqa súıeıtin asqar taý áke joq, jalǵyz ananyń tap­qan-taıanǵanyna qarap otyrǵan on eki múshesi túgel saý adam úshin qaı­bir jaqsy deısiz... Ras, anasy jolserik bolyp jumys isteıtin. Ol kisi bu­ryn­dary jumys týraly áńgime qoz­ǵalǵanda «jolserik» deı berse boldy, bul murynyn shúıirýshi edi-aý!.. Iá, buryn ol temirjol sa­lasyn erkekter ǵana jumys isteıtin qara dúrsindeý jer dep oılaıtyn. Sóıtse, bul jerde óz isin jan-tánimen súıetin, adam­nyń ishi-baýyryna kirip turatyn er kóńildi jandar eń­bek etedi eken. Eki-úsh reıske shyq­qannan keıin kóńilindegi kúdik pen qorqynysh seıilgen. Anasynyń qýanyshynda shek bolmady. Aldymen ol kisi óziniń súıikti isin jalǵastyrǵanyna rıza bolsa, ekinshiden Lıanasynyń ujymmen tez arada til tabysyp ketkenine qýandy. О́mirde kórgen-túıgeni kóp, bul saladaǵy tájirıbesi óte baı anasynyń aıtqan aqyl-keńesteri óziniń kádesine molynan jaraǵanyn Lıananyń ózi de maqtanyshpen aıtady. «Eger de, meniń qyzym bola­shaqta jolserik mamandyǵyn tańdar bolsa qýanar edim. О́ıt­keni, bul jumys tek qana názik jandylarǵa arnalǵan sııaqty bolyp turady men úshin», dep syr bólisedi Lıana. Lıananyń oıynsha, áıelder qaýymy o bastan psıholog bolyp jaratylǵan. Al jolserik ma­mandyǵy úshin bul aýadaı qajet qasıet. Adamdarmen til tabysqan óz aldyna, poıyz ústinde, vagon ishinde úıdegideı jylylyqtyń sáýlesin seýip, qustyń uıasyndaı jaıly ete bilý tek qana áıel zatynyń qolynan keletin óner dep esepteıdi ol. Iá, «Bazarǵa, qarap tursam árkim barar» demekshi, bolat jolmen júıtkigen poıyzben kimder júrmeıdi deseńizshi?! Alýan túrli adamdar – sirkesi sý kótermeıtinder, tyrnaq astynan kir izdep otyratyndar, ashýy aldynda júretinder... sanaı berseń saýsaq jetpeıdi. Mine, jaqsy adamdardyń arasynda kezdesip qalatyn osyndaı jandardyń tilin tabý aıtqanǵa ǵana ońaı. Al bizdiń Lıana bolsa, bul istiń naǵyz sheberi bolyp alǵan. Onyń rııasyz kúlkisi, maıda tili, adamǵa degen iltıpaty bólek. Sodan da bolar, ózi jumys istegen úsh jyl ýaqyt ishinde bir de bir kıkiljiń sátke jol bermepti. Alǵany – tek qana alǵys pen bata. «Jumys barysynda adam­darǵa ózińdi durys kórsete bil­genniń mańyzy zor. Jolaý­shy­lardyń janyn túsinip, tilin tabý – bizdiń mamandyqtyń bas­ty mindeti. Poıyz degenniń ózi temirjoldyń ústindegi úı ǵoı, vagonyńyz ýaqytsha bolsa da janǵa jaıly baspana emes pe?! Iаǵnı, shańyraqtaǵy shýaqty saq­taı bilý tek áıel balasynyń ǵana qolynan keledi», – degen Lıananyń sózimen kelispeske taǵy bolmaıdy. Lıana jumystan bos kezinde jattyǵý zalyna baryp, ózin kú­tip ustaýǵa kóp kóńil bóledi. Sán úlgilerin saralap, kosmetıka álemindegi jańalyqtardy da qur jibermeı tanysyp otyrady. Jumystyń talaby sondaı – únemi symdaı tartylyp, symbatty bolyp júrý kerek! Qaırat ÁBILDINOV, «Egemen Qazaqstan».  QARAǴANDY.