Árbir kásiporynda óziniń kásibine adal, isine berilgen, ózi eńbek etken ortamen bite-qaınasyp ketken adamdar bolady. Olardyń ózi jumys isteıtin kásiporynǵa ekinshi úıindeı baýyr basyp ketetini de sondyqtan. Eýrazııalyq topqa kiretin «Qazhromda» da mundaı jumysshylar az emes. Olardyń biri – Aqtóbe ferroqorytpa zaýyty ótim bóliminiń júkti qabyldap-tapsyrýshysy Tamara Saıtıeva desek, artyq aıtqandyq bola qoımas. Týabitti qasıetpen únemi jadyrap, jarqyldap, kúlimdep júretin ol, qarap otyrsa, zaýytqa óz ómiriniń 30 jylyn arnaǵan eken.
Tamara Saıtıeva zaýytta 1982 jyldan beri jumys isteıdi. Osydan týra otyz jyldan astam ýaqyt buryn temirjol sehynyń jergilikti parkiniń operatory bolyp eńbek jolyn bastaǵan-dy. Zaýytqa jumysqa turýǵa oǵan osynda jumys jasaıtyn apasy keńes bergen bolatyn. Mine, sodan beri kásiporynda taban aýdarmaı eńbek etip keledi.
2007 jyly ony temirjol sehy kásipodaq komıtetiniń tóraıymy etip saılady. Endi kúndelikti óndiristik tapsyrmalarmen qosa sehtaǵy áriptesterine áleýmettik qoldaý kórsetý boıynsha mindet de qosyldy. Árıne, áriptesteriniń qaýipsiz eńbek etýi úshin eńbekti qorǵaý boıynsha kásibı turǵyda jáne kásipodaq boıynsha da oń kózben qaraý, muqııat qadaǵalaý qajet boldy. Seh ujymynyń yntymaǵy men óndiristik tabystary da sehtyq kásipodaq komıtetiniń júıeli jumysyna táýeldi. Bir sózben aıtqanda, munda ol aralaspaıtyn másele joqqa tán. Qashanda qaraqan basynan góri ózgeniń júzi jarqyn bolýyna umtylatyn Tamaranyń osy bolmys-bitimi ony óz ortasyna syıly etti. Áriptesteri ony «Bizdiń Toma» dep jandaryna jaqyn tarta ataýy da sondyqtan.
– Menińshe, árbir adam óz kásibin júregimen unatyp, jaqsy kórýi tıis. Meniń súıikti kásibim qıyn ári jaýapkershilikti talap etedi. Men munda kóptegen jaqsy adamdarmen dostastym. Meniń jumysym – meniń ómirimniń aınasy, óıtkeni, osynda eńbek ete júrip, ózimniń ómirlik serigimdi kezdestirdim, úsh bólmeli páterge qol jetkizdim. Demalys kúnderi kóp nárseni isteýge úlgere almaı jatamyn, degenmen, ýaqytymnyń negizgi bóligin otbasymmen ótkizemin. Jazda bárimiz saıajaıda demalýdy unatamyz. Kókónis, jemis-jıdektiń túr-túrin ósirip, qystyń qamyn jasaımyz. О́sip kele jatqan súıikti nemerelerimniń tárbıesimen aınalysý meni erekshe baqytqa bóleıdi, – deıdi Tamara Saıtıeva.
О́ndiris ozaty eńbektegi tabysy úshin birneshe ret Alǵys hattarmen jáne Qurmet gramotalarymen jáne úshinshi dárejeli «Eńbek dańqy» belgisimen marapattalǵan.
Satybaldy SÁÝIRBAI,
«Egemen Qazaqstan».
Aqtóbe oblysy.