Orny bólek onkúndik

Shyǵys aımaǵynda Ulystyń uly kúnin merekeleý bastaldy

Shyǵys óńirinde Ulystyń uly kúnine arnalǵan merekelik sharalar bastalyp ketti. Bıyl Altaı men Alakól arasyndaǵy aǵaıyn Naýryz merekesin aýqymdy túrde atap ótip, ulyq meıram on kúnge ulaspaq. 13 naýryz kúni osy onkúndiktiń tusaýy kesildi. Ár kúnniń óz urany men taqyryby, ortaq maqsaty bar. Bul dúnıeler kóktem merekesiniń bolmysyn beıneleýge, jalpy adamzatqa tán qasıet-qundylyqtardy nasıhattaý men bekitýge arnalǵan. Onkúndik sheńberinde oblys kóleminde 600-den astam qoǵamdyq mańyzy bar sharalar ótkizý josparlanyp otyr. Aıtalyq, «Yrys» kúnin­de aýylsharýashylyq taýar­larynyń jármeńkesi ótki­zilip, merekelik konsertter uıymdastyryldy. Oblys ortalyǵyna Kúrshim aýdanynyń aýyl sharýashylyǵy taýaryn óndirýshileri men ónerpazdary kelip, óz ónimderin arzan baǵamen usynyp, merekelik konsert qoıdy. 14 naýryz – «Dástúr» kúninde halyq­tyq qoldanbaly óner kórme­leri uıymdastyrylyp, sheber­lik saǵattary men qolóner­shilermen kezdesý ótti. «Jańǵyrý» kúninde mektep oqý­shy­lary men jastardyń eldi mekenderdiń damýyna úlken úles qosqan, ıaǵnı, «Týǵan jerge – taǵzym!» aksııasynyń qatysýshylarymen, eńbek ardagerlerimen kezdesýler ótkizýi josparlanǵan. 16 naý­ryz – «Kóktem shýaǵy» kúnin­de «Qyzǵaldaqtar mere­kesi», jastar flesh-moby, kórmeler, balalar shyǵar­mashylyǵy baıqaýlary ótedi. «Qamqorlyq» kúninde soǵys jáne eńbek ardagerlerin Naýryz merekesimen quttyqtaý, qart adamdardyń sharýasyna qolǵabys etý, balalar úıi men dárigerlik-áleýmettik mekemelerge barý sharalary kózdelgen. 18 naýryz – «Jańarý» kúni. Bul kúni shyǵysqazaqstandyqtar senbilikke shyǵyp, aýlalar men kóshelerdi tazalap, tazalyq jumystaryn júrgizbek. «Jara­sym» kúninde oqý orynda­rynda kóne merekelerdiń fı­lo­sofııalyq mánin ashatyn shyǵarmalarǵa baıqaý jarııalanyp, kitaphanalarǵa ádebıet ókilderi keledi. «Qýanysh» kúninde barsha bilim meke­me­leri men ǵımarattarǵa, ortalyq kóshelerge bezendirý jumystary júrgizilip, deko­ratıvti-qoldanbaly óner kórmeleri uıymdastyrylady. «Shattyq» kúninde buqaralyq mádenı sharalar legi aıasynda án men bı baıqaýy, aıtys, shyǵarmashylyq ókilderimen kezdesý ótedi. Al kún men tún teńelgen, Shyǵys halqy erekshe qadir tutatyn 22 naý­ryz – Ulystyń uly kúni! Ulys kúninde óńirdiń barlyq qalalary men aýdandarynda áz-Naýryz nyshandary túgeldeı qamtylǵan merekelik baǵdarlamamen birge, kókpar, aýdaryspaq, kúres, qyz qýý, teńge ilý sııaqty ulttyq sport oıyn­darynan jarys­tar, úzdik kıiz úı baıqaýlary ótki­zil­mek. Jastarǵa arnalǵan «Altybaqan», «Aıqysh-uı­qysh», «Aqserek, kókserek», «Alqaqotan» syndy ulttyq oıyndar da mereke kórkin qyzdyra túsedi. – Naýryz merekesi – bıyl jyl boıy ótetin ózge meıramdar sekildi, Táýelsizdiktiń 25 jyldyǵyna arnalady. Negizgi maqsat – elimizdegi kelisim men birlikti arttyrý, jalpyulttyq sana men ortaq mádenı-rýhanı qundy­lyqtar qalyptastyrý. Jos­par boıynsha, naýryz aıynda ulttyq dástúr men otbasy qun­dylyqtaryn saqtaý men nasıhattaýǵa baǵyttalǵan 600-den astam is-shara ótkiziledi, – dedi oblys ákiminiń orynbasary Jaqsylyq Omar. Dýman ANASh, «Egemen Qazaqstan». Shyǵys Qazaqstan oblysy.