ASTANA. 15 naýryz. Bolıvııada ótken jyldyń qarasha aıynan búginge deıin «El-Nıno» qubylysynan 19 adam qaza tapty. Sondaı-aq, 60 myń otbasy zardap shekti. Bul týraly TASS aqparat agenttigine silteme jasaǵan egemen.kz tilshisi habarlady.
«Búginge deıin qaza tapqandar sany 19 adamǵa jetti, 60 myńǵa jýyq otbasy zardap shekti. Sondaı-aq, 30 myń gektar jerge egilgen egistikke zaqym keldi. Al 15 myń bas mal qyrylyp qaldy», – deıdi Bolıvııanyń qorǵanys mınıstri Reımı Ferreıra.
Onyń aıtýynsha, tabıǵat apatyna baılanysty eldiń 7 departamentine qaýiptiliktiń joǵary deńgeıi jarııalandy. «El-Nıno» ásirese, La-Pas, Kochabamba, Chýkısaka, Benı jáne Santa-Krýs departamentterine aıtarlyqtaı shyǵyn ákeldi. Tolassyz jaýǵan jaýynnyń sońy sý tasqynyna ulasqan. Saldarynan sońǵy birneshe kún ishinde 3 adam mert boldy. Sondaı-aq, Kochabambada birqatar eldi meken jaryqsyz qaldy. Al eldiń ońtústiginde jaǵdaı kerisinshe, qurǵaqshylyq jaılaǵan.
Aıta keteıik, atalǵan qubylys túri Tynyq muhıtynyń ekvatorlyq bóliginde temperatýranyń aýytqý qubylysy. «El-Nınonyń» saldarynan keıbir aımaqtarda tolassyz jaýyn jaýsa, keı jerlerde qurǵaqshylyq bolady.
Aıan Ábdýálı.
Derek: TASS.
Sýret: veja.abril.com.br.