Taldyqorǵandaǵy Jýrnalıster úıinde Qazaqstan Respýblıkasyndaǵy saılaýdy baıqaý jónindegi respýblıkalyq qoǵamdyq komıssııasy Almaty oblystyq fılıalynyń tóraǵasy Ádilǵazy Esmurzanov jýrnalıstermen baspasóz brıfıngin ótkizdi.
Onda Parlament Májilisi men máslıhattar depýtattaryn saılaýdy qadaǵalaý barysynda atqarylatyn jumystar men daıyndyq máselesi baıandaldy. Almaty oblysynda 931 saılaý ýchaskesi bolsa, sonyń ishinde áskerı bólimder sekildi baıqaýshylardy kirgizbeıtin 50 jabyq saılaý ýchaskesi taǵy bar.
Jalpy, fılıal tarapynan Taldyqorǵan qalasyndaǵy 51 baıqaýshynyń basyn qosqan semınar jáne Eskeldi, Kóksý, Qaratal aýdandary men Tekeli qalasynan quralǵan 124 baıqaýshymen kóshpeli semınar ótkizilipti. Sondaı-aq, oblystyq ákimdiktiń kishi zalynda onlaın rejimindegi beınesemınarda 881 baıqaýshynyń basy qosylǵan. Fılıal baıqaýshylary barlyq saılaý ýchaskelerinde tirkelgen.
Eger qandaı da bir keleńsizdik, túsinispeýshilik týyndap jatsa, baıqaýshy mindeti dereý fotosýretke nemese beınetaspaǵa túsirip alýy kerek. Sol jaǵdaıdy komıssııa tóraǵasyna eskertip, saılaý erejesine sáıkes akt toltyryp, jeke qoldaryn qoıyp rastap, is qaǵazyna tirketedi. Qoǵamdyq negizde jumys isteıtin ár baıqaýshyǵa 20 naýryz kúni tańerteńnen keshke deıin saılaý ýchaskesinde bolǵany úshin bir kúnge 4 myń teńgeden aqy tólenetini de aıtyldy.
Saılaý zańnamasy boıynsha ár saılaýshynyń jeke kýáligi arqyly bir dana bıýlleten beriledi eken. Bir adamǵa birneshe bıýlleten berý zańsyzdyq bolyp sanalady. Brıfıngte jýrnalıster tarapynan qoıylǵan ózge de suraqtarǵa fılıal basshysy jaýap berdi.
Nurbol ÁLDIBAEV,
«Egemen Qazaqstan».
Taldyqorǵan.