ALMATY. 25 naýryz. Keshe Almatyda M. Áýezov atyndaǵy Qazaq memlekettik akademııalyq drama teatrynda «Teatr kóktemi – 2016» festıvali bastaldy. Bul týraly M. Áýezov atyndaǵy Qazaq memlekettik akademııalyq teatrynyń baspasóz qyzmetine silteme jasaǵan egemen.kz tilshisi habarlady.
Jyl saıyn Naýryz merekesi jáne Halyqaralyq teatr kúnine oraı ótkiziletin dástúrli festıval teatrdyń búgingi baǵyt-baǵdaryn anyqtaýǵa, repertýar saıasatyndaǵy izdenisterge jol ashýda, sondaı-aq dramatýrgııa, rejısser, akter óneriniń búgini men erteńin zerdeleýge múmkindik beredi.
Festıvalde aldymen kishi zalda álemniń kóptegen elderindegi teatrlarda san márte ártúrli ınterpretasııalarmen sahnalanǵan «Medeıa» tragedııasy qoıyldy.
Sharanyń saltanatty ashylýynda teatr dırektory Erlan Bilál sóz sóılep, festıvalge qatysýshylardy óner merekesimen quttyqtady. Sodan keıin KSRO halyq artısi Asanáli Áshimovtiń qoıýymen «Qaza men jaza» spektakline kezek berildi. Budan keıin kórermender nazaryna ótken maýsymdaǵy «Aı men Aısha» jáne «Qaza men jaza» dramalary, bıylǵy premelar - «Qoshtasqym kelmeıdi», «Almas qylysh» usynylady.
Teatr úshin 90-maýsym úlken tabystarmen bastaldy. Taraz qalasynda atalyp ótken Qazaq handyǵynyń 550 jyldyq merekesinde Muhtar Áýezov teatry «Qıly jol» tarıhı dramasyn usyndy. Teatr ujymy Qyrǵyzstanda ótken ARD ORDO halyqaralyq festıvalinde «Qas-qaǵym» tragedııasy úshin, Atyraýda Rahymjan Otarbaev atyndaǵy halyqaralyq festıvalde «Beıbarys sultan» tarıhı dramasy úshin bas júldeler aldy.
Aınash Esalı.
Derek: M. Áýezov atyndaǵy Qazaq memlekettik akademııalyq drama teatrynyń baspasóz qyzmeti.
Sýret: silkadv.com.