Iаdrolyq qarýsyz álem – bul Qazaqstannyń basty maqsaty. Memleket basshysy N.Á.Nazarbaevtyń bastamasymen «ATOM» jobasy qurylyp, ony júzege asyrý boıynsha birqatar jumystar atqaryldy. Aıta ketý kerek, atalǵan joba boıynsha Semeı synaq polıgonyndaǵy ıadrolyq jarylystardan zardap shekkenderdi áleýmettik qorǵaý boıynsha is-sharalardy jetildire túsýge erekshe kóńil bólingen.
Bul rette, radıasııalyq medısına men ekologııa ǵylymı-zertteý ınstıtýty jarylystardyń medısınalyq jáne radıoekologııalyq saldaryn anyqtaýda túrli zertteý jumystaryn júrgizýde. Atqarylǵan jumystardy talqylaý maqsatynda Semeı qalasy ákimdiginde Shyǵys Qazaqstan oblystyq jumyspen qamtý jáne áleýmettik baǵdarlamalardy úılestirý basqarmasynyń uıymdastyrýymen dóńgelek ústel ótti. Onyń barysynda Semeı ıadrolyq synaq polıgonynan zardap shekken azamattardy áleýmettik qoldaý men medısınalyq qyzmet kórsetý týraly egjeı-tegjeıli áńgime qozǵaldy.
– Búginde synaqtardan zardap shekken 290 myń 405 adam eńbekaqylaryna qosymsha ústeme aqy alyp otyr, – dedi Densaýlyq saqtaý jáne áleýmettik damý mınıstrliginiń áleýmettik kómek departamentiniń dırektory Arman О́mirbaev. – Jyl basynan beri osy sanattaǵy 194 adam baspanaǵa qol jetkizdi. Jáne elimizdiń BUU-nyń «Múgedekterdiń quqyqtary týraly» konvensııasyn ratıfıkasııalaýy da óz jemisin berýde. Qazaqstan TMD elderi arasynda «Arnaıy áleýmettik qyzmetter týraly» zańdy birinshi bolyp qabyldady. Osyǵan oraı qyzmet kórsetýdiń standarttary engizildi. Elimizdiń 14 óńirinde múmkindigi shekteýli jandarǵa arnalǵan 47 kúndizgi bólimshe ashyldy. О́tken jyly atalǵan bólimsheler eki myń adamǵa áleýmettik qyzmet kórsetti. Nátıjesinde balalar úıi men ınternattardan 492 bala otbasylaryna oraldy. Jarymjan balalaryn kúndizgi bólimshelerge qaldyrýǵa múmkindik alǵan 600-ge jýyq ata-ana jumysqa ornalasty.
Raýshan NUǴMANBEKOVA.
Semeı.