Álem-jálem álem
AQSh-ta prezıdenttikten úmitker Hılları Klıntonmen, sondaı-aq, akter Djordj Klýnımen jáne onyń advokat áıeli Amalmen qaıyrymdylyq keshinde dastarqandas bolyp otyrǵysy keletinderge 353 400 dollar aqy tóleý usynyldy.
Atalmysh shara 15 sáýir kúni Kalıfornııada turatyn kásipker Shervın Pıshevardyń úıinde ótedi. Erteńine Klınton men erli-zaıypty Klýnıler bulardyń sońǵylarynyń otbasynda kezdesedi. Sol kúni Gollıvýd juldyzymen bir ústeldiń ústinde otyrýǵa qushtarlar taǵy 33 myń dollardan tóleýleri tıis.
Italııa túrmesinde dámdi taǵamdar restorany ashyldy
Mılan provınsııasyndaǵy Bollate dep atalatyn túrmeniń ǵımaratynda alýan túrli dámdi taǵamdar daıyndaıtyn restoran paıda boldy.
InGalera («Katorgada») degen ataý berilgen qoǵamdyq tamaqtandyrý mekemesi óziniń osy atyn tolyq aqtaıdy. Munyń máni – restorannyń barlyq jumystary túrmede jazalaryn ótep jatqandardyń ıyqtaryna ilingen. Túrme basshylyǵy munyń qamaýda otyrǵandardyń qoǵammen qarym-qatynasyn ornyqtyryp, ózderin durys jolǵa salyp jiberý úshin jasalyp otyrǵanyn aıtady.
«Noý Kamp» Iohan Kroıftyń qurmetine berilýi tıis
Ispanııanyń «Barselona» klýbynyń jankúıerleri áleýmettik jeli arqyly «Noý Kamp» stadıonyna aty ańyzǵa aınalǵan fýtbolshy Iohan Kroıftyń esimin berýdi talap etip jatyr.
Naýryzdyń 24-i kúni 68 jasynda baqılyq bolǵan golland fýtbolshysy 1973 jyldan «Barselona» sapynda 5 maýsym oınaǵanynan bólek, 1988-1996 jyldary osy klýbty bas bapker retinde ózi jattyqtyryp, ony Ispanııanyń 4 dúrkin chempıony da etken bolatyn.
Qazirgi kúnniń erkekteri – kóńilshek
Osy zamanǵy er kisiler óz ákelerine qaraǵanda, kóńilshek bolyp shyqty. Muny Universal Channel telearnasy 2000 adamnyń qatysýymen júrgizgen saýaldama anyqtady.
Habar barysynda mamandar qazirgi kezdegi erkekterdiń qoǵamdyq oryndarda óz ákelerine qaraǵanda, kózderine jasty kóbirek alatynyn ańǵarypty. Orta jastaǵy er kisiler 14 ret kózderine qol oramaldaryn aparsa, aǵa urpaq ókilderi muny nebári 5 ret jasaǵan. Jas jigitter túkke turǵysyz nársege bola kózderin sýlap qoıa salmaı, arasynda eńirep jylap turǵan.
Fýtbol oınaıtyn – balalar, tóbelesetin – ákeleri
Anglııanyń Ýest-Mıdlends graftyǵyndaǵy Heılsoven qalasynda balalar fýtbol matchynyń sońy ata-analar tóbelesimen aıaqtaldy.
Jastary 14-ke deıingi jasóspirimderdiń ujymdary kezdesip jatqan. Kezdesýdiń bitýine 5 mınýt qalǵanda tóreshi komandalardyń biriniń qaqpasyna úsh ret penaltı belgilep, taǵy eki oıynshysyn alańnan qýady. Buǵan ashýlanǵan ata-analar arbıtrge bas salady. Bul súrginge qarsy komanda oıynshylarynyń ata-analary da qosylyp ketedi.
Alkogoldi azdap ishýdiń paıdaly ekeni beker sóz
Ulybrıtanııadaǵy Vıktorııa ýnıversıtetiniń mamandary alkogoldi azdap iship turý adam aǵzasyna paıdaly ekeni týraly mıftiń kúlin kókke ushyrdy.
Ǵalymdar buǵan adamdardy ártúrli toptarǵa bólip, olarǵa ár qıly deńgeıde spırtti ishimdik ishkizip kórý arqyly júrgizgen tájirıbeleriniń negizinde kóz jetkizdi. Tájirıbe alkogoldiń qandaı mólsherdegisi de adamǵa paıda ákelmeıtinin aıǵaqtap bergen.
Aqparat agenttikteriniń materıaldary negizinde daıyndaldy.