ASTANA. 26 naýryz. Búgin Qazaqstan Respýblıkasynyń Prezıdenti Nursultan Nazarbaevtyń Jarlyǵymen Batys Qazaqstan oblysynyń ákimi bolyp Altaı Kólginov taǵaıyndaldy. Bul týraly egemen.kz tilshisi habarlady.
Premer-mınıstr Kárim Másimov pen Qazaqstan Prezıdenti Ákimshiliginiń jetekshisi Nurlan Nyǵmatýllın aldymen oblystyq máslıhat depýtattarynyń talqysyna aımaqtyń jańa basshysynyń kandıdatýrasyn usyndy. Halyq qalaýlylary Altaı Kólginovti qoldap, biraýyzdan daýys berdi.
Osydan keıin jańa ákim oblys aktıvine tanystyryldy.
Altaı Seıdiruly Kólginov 1978 jyly týǵan. Q. Iаssaýı atyndaǵy halyqaralyq qazaq-túrik ýnıversıtetin, Qazaqstan Respýblıkasy Prezıdenti janyndaǵy memlekettik basqarý akademııasyn, Shotlandııanyń Aberdın ýnıversıtetin bitirgen.
Altaı Kólginov 2000 jyly ásker qatarynan oralǵan. 2001-2008 jyldary Ádilet mınıstrliginde, memlekettik qyzmet jóninde agenttik pen Bas prokýratýrada ártúrli qyzmetter atqarǵan.
2008-2010 jyldary «Alash Medıa Grýpp» jaýapkershiligi shekteýli seriktestiginiń bas dırektorynyń orynbasary, 2010-2012 jyldary Qazaqstan Prezıdenti Ákimshiliginiń memlekettik baqylaý jáne uıymdastyrý-terrıtorııalyq jumystar bóliminiń bas ınspektory bolǵan. 2012 jyldyń aqpanynan 2013 jyldyń sáýirine deıin Batys Qazaqstan oblysy ákiminiń orynbasary bolyp istedi. Al 2013 jyldyń sáýir aıynan beri Oral qalasynyń ákimi bolyp qyzmet atqaryp kelgen.
Temir Qusaıyn.
Derek: egemen.kz.
Foto: oraloniri.kz.