ASTANA. 28 naýryz. Áleýmettik jelide apatty jaǵdaıdaǵy ushaqty jerge qondyryp, talaı adamnyń ómirin saqtap qalǵan Bek Air áýe kompanııasynyń ushqyshtaryna «Halyq qaharmany» ataǵyn berý týraly usynystar aıtylyp jatyr. Bul týraly egemen.kz tilshisi habarlady.
Bul oqıǵa keshe tańerteń boldy. BekAir áýe kompanııasynyń «Fokker-100» tıpti ushaǵy Qyzylorda qalasynan baǵyt alyp, Astana áýejaıyna jaqyndaǵanda shassıdiń aldyńǵy tireý taǵanynsyz apattyq jaǵdaıda jerge qondy.
Ushaq Astanaǵa saǵat 9.45-te qonýǵa tıis bolatyn. Alaıda órttiń shyǵý qaýpin azaıtý qajet bolǵan soń, ushaq áýede taǵy 50 mınýtteı ushyp júrdi. Sóıtip, ol saǵat 10.36-da qondy. Onyń bortynda 116 jolaýshy men 5 ekıpaj múshesi boldy. Ushaq ekıpajynyń arqasynda 116 jolaýshy aman qaldy. Eshkim zardap shekken joq. Sonymen birge Astana áýejaıy men qalanyń shuǵyl qyzmetteriniń úılesimdi jumysyn da atap ótý kerek. Ushaq jerge qonǵanda qosymsha 7 órt tehnıkasy men 4 jedel járdem máshınesi ázirlendi.
«Qazirgi kezde Investısııalar jáne damý mınıstrliginiń arnaıy komıssııasy quryldy. Zertteý nátıjesi keıinirek habarlanatyn bolady. Bek Air áýe kompanııasy ushaǵynyń Astana áýejaıynda apatty jaǵdaıda qonýynyń sebebi anyqtalady», dedi mınıstr Áset Isekeshev.
Dastan Kenjalın.
Derek, foto: egemen.kz