QOSTANAI. 29 naýryz. Oblystyq ishki ister basqarmasynyń esirtkimen kúres bóliminiń qyzmetkerleri jeke sektorda turatyn zeınetker áıeldiń úıinen 200 gram geroın tapty. Bul týraly oblystyq ishki ister departamenti baspasóz qyzmetine silteme jasaǵan egemen.kz tilshisi habarlady.
Birinshi túıinshekti polıseıler zeınetker jatqan dıvanynyń astynan tapty. Geroın polıetılen qaltada saqtaýly eken. Polıseıler úıdiń aýlasyn odan ári tintidi. Aýladaǵy qurylys ishinen ekinshi túıinshekti tapty. Ol da geroın bolyp shyqty. Ekeýin ólshegende 200 grammǵa jetti. Bul óte úlken kólemdegi salmaq bolyp tabylady. Osy oqıǵa boıynsha qylmystyq is qozǵaldy. Qazir kúdikti Rýdnyı qalasyndaǵy ýaqytsha ustaý ornyna jiberildi.
Jyl basynan beri Qostanaı oblysynda zańsyz esirtki aınalmynyń 122 faktisi tirkeldi. Olardan 3 kılogramǵa jýyq esirtkiniń birneshe túri tárkilendi.
Názıra Járimbetova.
Derek, sýret: oblystyq ishki ister departamenti baspasóz qyzmeti.