Keshe Qazaqstan Respýblıkasy Tuńǵysh Prezıdentiniń Mýzeıinde «BI Juldyzaı-2016» múmkindigi shekteýli balalar shyǵarmashylyǵynyń XI Respýblıkalyq festıvaliniń bastalýyna arnalǵan baspasóz máslıhaty bolyp ótti.
Festıvaldiń negizgi maqsaty – múmkindigi shekteýli balalardyń shyǵarmashylyq qabiletin shyńdap, olardyń úlken sahnadan kórinýine kómek kórsetý. Osy on bir jyl ishinde festıvalge 36 583 bala qatysyp, odan júldeger atanǵandar Bala Turkvisyon baıqaýynda baq synap, Belaıa Trost festıvaline joldama alyp, endi biri, 2015 jylǵy MÝZ-TV syılyǵyna qol sozǵandarmen birge óner kórsetip jatsa, solardyń qatarynda osy festıvaldiń arqasynda Qazaq ulttyq óner ýnıversıtetiniń stýdenti atanyp úlgergen daryndy jastar da bar. Festıval jyl saıyn Qazaqstan Respýblıkasy Bilim jáne ǵylym mınıstrliginiń, sondaı-aq, oblystyq jáne qalalyq bilim berý basqarmalarynyń qoldaýymen ótkizilip keledi.
Bıylǵy jyly birinshi irikteý kezeńi 5 sáýirde bastalady dep josparlanýda. Qazylar alqasynyń quramynda Qor jetekshileri men qazaqstandyq estrada juldyzdary bolady. Olar elimizdiń 16 qalasyn, dálirek aıtsaq, Almaty, Taldyqorǵan, Shymkent, Taraz, Qyzylorda, Atyraý, Aqtaý, Aqtóbe, Oral, О́skemen, Pavlodar, Kókshetaý, Petropavl, Qostanaı, Qaraǵandy jáne Astanany aralap shyǵady.
Qazylar alqasy qatysýshylardyń ónerin «horeografııa», «vokaldyq oryndaý», «aspaptyq oryndaý», «ándi ısharamen oryndaý», «sándik-qoldanbaly shyǵarmashylyq», «beıneleý óneri» atalymdary boıynsha baǵalaıdy. Aralyq qorytyndylar men jeńimpazdar pleneri respýblıkalyq «Baldáýren» balalar lagerinde ótkiziletinin esterińizge salamyz.
Ekinshi irikteý týryna ótken qatysýshylardy qyzyq mazmundy baǵdarlama – elimizdiń basty sahnasynda óner kórsetý, sheberlik synyptary, ekskýrsııalar, kórmeler, tanymal otandyq juldyzdarmen kezdesý, jańa dostarmen tanysý jáne tamasha merekelik aýan kútip tur.
Balalar shyǵarmashylyǵyn óristetýge baǵyttalǵan óner básekesi dástúr boıynsha Balalardy qorǵaý kúni – 1 maýsymda «Qazaqstan» Ortalyq konsert zalynda támamdalady.
Raýan QAIDAR,
«Egemen Qazaqstan».