27 000 volttyq tok urǵan

oqýshy qyz aman qaldy Qostanaıda 10-synypta oqıtyn 17 jastaǵy qyzǵa eki keshtiń arasynda va­gon­nyń ústine shyǵý qyzyq kórinipti. Ol vagonnyń ústine kóterilgende, 27 000 volttyq elektr togy urady. Perishte qaǵyp, aman qalǵan qyz qu­laǵan jerinde bir saǵattaı jatyp qalady. Ony keshkisin ózine bekitilgen aımaqty aralap júrgen kúzetshi kezdeısoq taýyp alady. Qyz shyryldap jatyr eken. Tótenshe jaǵdaılar departamentiniń qutqarýshylary zarar shegýshini vagonnyń ústinen bir jarym saǵat degende túsirip aldy. «Jedel járdemmen» qalalyq aýrýhananyń jan saqtaý bólimine jetkizildi. – Elektr jaraqatynyń saldarynan qyz denesiniń 30 paıyzy kúıip qalǵan. Kúıik dendep ketkendikten, jaǵdaıy da aýyr, – deıdi Qostanaı qalalyq aýrýhanasynyń bas dárigeri Samat Shú­menbaev. Oqýshy óziniń vagonǵa nege shyqqanyn naqty aıta almaıdy, «vagonǵa shyǵý qyzyq kórindi», deıdi. Degenmen, ózi de «ıt kóı­lekpen týǵan» eken. Áıtpese, 27 000 volt soqqan adamnyń tiri qalǵany joq. – Vagonnyń ústinen jasóspirim qyz ne kóre qoıaıyn dedi eken? Onda tok symynyń jalańashtanyp qalǵanynan habary bolmaǵan-aý, – deıdi Qostanaı irilendirilgen dıstansııalyq jolynyń ınjeneri Sergeı Solomatov. Oblysta ótken jyly da osyǵan uqsas oqıǵa oryn alǵan bolatyn. Shalǵyshy stansasynda mektep bitirýshiler selfı jasaýǵa kelisip, astyq tıeıtin vagonnyń ústine shyǵady. Onda balalardy elektr togy uryp, qaza bolǵan edi. Abaılamasa, ajal kez kelgen tustan aýzyn ashady. Názıra JÁRIMBETOVA, «Egemen Qazaqstan». QOSTANAI.