Kardenniń kolleksııasyn kórsetýge qatysty
Semeı qalasynyń eki birdeı oqýshy qyzy aıdy aspanǵa bir-aq shyǵaryp, Máskeýde ótken joǵary moda aptalyǵynda úzdikter qatarynan tabyldy. Osy synda Dınara Baımuratova men Dıana Baqtııarqyzy fransýzdyń ataqty modeleri Per Kardenniń kıim úlgilerin kıip kórsetetin sýpermodelder qatarynan oryn aldy.
Reseı astanasynyń Qyzyl alań jıeginde ornalasqan «Qonaqtar aýlasy» aýmaǵyndaǵy basty tuǵyrynda ótken aptalyqta 200 eldiń ókilderi baqtaryn synady. Sol saıysta Semeıdiń 15 jáne 16 jastardaǵy eki oqýshy qyzy sán úlgilerin kórsetetin qyzdar arasyndaǵy tańdaýly 20 modeldiń qataryna kirdi. Jıýrı munda qyzdardyń modeldik parametrlerine ǵana emes, sonymen qatar olardyń tabıǵı sulýlyqtaryna da qaraǵan kórinedi. Nátıjesinde kórsetilimde tamasha óner kórsetken semeılik qyzdar barynsha qatań synaq ótkeleginen sátti ótip, Per Kardenniń óziniń kolleksııalaryn tanystyrý saltanaty tórinen oryn aldy.
Endi olardyń aldarynda Parıjdi baǵyndyrý maqsaty tur.
Murat AITQOJA.