Aqmola oblysynyń ákimi Sergeı Kýlagın kezekti jumys saparymen Zerendi, Sandyqtaý, Atbasar aýdandarynda bolyp, kóktemgi sý tasqynynyń qaýpi joǵary eldi mekenderdi aralady. Ásirese, Atbasar aýdanynyń Jabaı ózeni mańyndaǵy eldi mekender aıryqsha nazarǵa alyndy.
– Bıyl óńirde qar kóp tústi. Sol sebepti sý tasqynynyń qaýpi de joǵary. Aldyńǵy jyldaǵy jaǵdaı qaıtalanbas úshin daıyndyq jumystaryn erte bastap kettik. Qazirgi kezde qalaǵa Jabaı ózeninen qaýip tónip tur. Osyǵan oraı ózen jaǵasyn boılaı uzyndyǵy 5,6 shaqyrym, bıiktigi 4-7 metr bóget turǵyzylýda. Oǵan 12 ekskavator tartylǵan. Oǵan qosa qaýipti aımaqtardaǵy turǵyn úıler men áleýmettik nysandardyń mańy qum toltyrylǵan qaptarmen qorshaldy. Apattyń aldyn alý jumystaryna turǵyndar da bir kisideı atsalysýda, – dedi Atbasar aýdanynyń ákimi Andreı Nıkıshov ákimge bergen esebinde.
Oblys ákimi S.Kýlagın aldymen kóktemgi sý tasqynynyń aldyn alý sharalaryna kómek kórsetip júrgen halyqqa alǵysyn aıtty. Bul apatpen kóp bolyp kúrespesek, erteń onyń aýyr saldarymen kúresýge týra keledi, deı kele ákim Atbasar aýdanyndaǵy sý tasqynynyń aldyn alý sharalaryna jýyrda 20 mıllıon teńge qarjy bólingenin, oǵan qosa birer kúnde taǵy 20 mıllıon teńge qarajat bosatylatynyn atap ótti.
Sondaı-aq, óńir basshysy osy kúni Sandyqtaý aýdanynyń mańyndaǵy Jabaı ózeni ústimen ótetin kópirdiń beriktigin teksertip, tótenshe jaǵdaılar kartasyna engizilgen óńirdegi jalpy jaǵdaımen tanysty. Sandyqtaý aýdanynyń ortalyǵy Balqashyn selosynan shyǵaberiste TJ boıynsha sý tasqynynyń aldyn alý sharalaryna jumyldyrylǵan apattyq-qutqarý jáne kommýnaldyq sala tehnıkalary jumys barysyndaǵy synaqtan ótkizildi. Osy jerde ol aýdannyń tótenshe jaǵdaı qyzmetkerlerimen júzdesip, sý qoımasy men ózenderge jaqyn ornalasqan eldi mekenderdegi jaǵdaıdy kúni-túni baqylaýda ustaýdy tapsyrdy.
– Qazir jaǵdaı óte kúrdeli. Daladaǵy qar tolyq erigen joq. Zerendi, Sandyqtaý, Atbasar aýdandary áli qar qursaýynda jatyr. Ásirese, Atbasar aýdanynda osy mezgilde mundaı qar kólemi bolǵan emes. Sondyqtan, kún-tún demeı sáýir aıynyń bel ortasyna deıingi qaýipti kúnderdi oıdaǵydaı ótkizýimiz kerek. Ol úshin sý basý qaýpi bar eldi mekenderge, áleýmettik nysandar men turǵyn úılerdi aman saqtap qalýǵa barlyq kúshti jumyldyryp, tıisti kerek-jaraqpen qamtamasyz etip, daıyn otyrýymyz qajet, – dedi oblys basshysy.
Al, Aqmola oblystyq TJD jańadan taǵaıyndalǵan basshy Alekseı Sovetov óńir basshysyna jýyq kúnderi respýblıkadan tıisti qol kómegi jetetinin baıandady. Atap aıtqanda, Atbasarǵa Almaty jáne Qyzylorda oblystarynan qosymsha 100 adam jáne 19 arnaıy tehnıka kómekke kelmek eken.
Baqbergen AMALBEK,
«Egemen Qazaqstan».
Aqmola oblysy.