Bul ulttyq oıyndar mektep baǵdarlamasyna enetin boldy
Ońtústik Qazaqstan oblysynda mektep baǵdarlamasyndaǵy dene shynyqtyrý pániniń júıesi ózgermekshi. Aldaǵy oqý jylynan bastap atalǵan pánge ulttyq oıyndarǵa arnalǵan jańa saǵattar engiziledi.
– Ár synyptyń oqýshylary 9 aıda kem degende 102 saǵat dene tárbıesi sabaǵyna qatysady. Endi bilim salasynyń mamandary osy saǵattardyń teń jartysyn ulttyq oıyndarǵa arnaýdy usyndy. Buǵan el aýmaǵyndaǵy sporttyq saıystarda ulttyq oıyndar sanynyń artýy sebep, – deıdi oblystyq bilim basqarmasyna qarasty aımaqtyq oqý-praktıkalyq dene tárbıesi ortalyǵynyń basshysy Jánibek Lebaev.
Búginde ulttyq oıyndardy halyqaralyq deńgeıde damytý mańyzdy bolyp otyr. Sondyqtan da kóshbasshy tolaǵaılardy tárbıeleý úshin bilim salasynyń mamandary júıeli jospar jasaýǵa kirisken. Olar aldymen ádistemelik kitaptardy jınaqtap, jańa kadrlardyń biliktiligin arttyrýǵa bet burdy.
Al 40 jyl ustaz bolǵan Rasıl Baıkov ulttyq sport túriniń óńirde órkendeýine birneshe kedergi bar, deıdi.
– Eń aldymen materıaldyq jaǵyn oılastyrý kerek. Ǵımarat, sosyn kókpar oıynyna jylqy qajet. Sondaı-aq, jylqylarǵa qaraıtyn adam taǵy kerek. Men bilikti jattyqtyrýshy-pedagogtar máselesin ekinshi kezekke qoıamyn. Kórdińiz be? Ulttyq oıyndardy mektep baǵdarlamasyna qosý úshin qanshama mashaqattanýǵa týra keledi, – dedi ol.
Dese de bilim salasynyń basshylary bul ýaqytsha másele, kedergiler bir-eki jylda sheshimin tabady. Biz keleshek urpaqtyń ulttyq oıyndardan qol úzbeýin, mektep tabaldyryǵynan olarǵa osyny úıretýdi kózdeımiz, dedi. Sondaı-aq, aımaqtyq oqý-praktıkalyq dene tárbıesi ortalyǵynyń basshysy Jánibek Lebaev: «Aldaǵy oqý jylynan bastap toǵyzqumalaq, kókpar, asyq atý, aýdaryspaq, qazaqsha kúres – 5 ulttyq oıyn mektep baǵdarlamasyna enedi. Bul úshin qazir jańa jospar-baǵdarlamalar ázirlenýde», – dep qysqa qaıyrdy.
Talǵat RAIYMBEK,
«Egemen Qazaqstan».
ShYMKENT.