О́ńirdegi ózenderdiń tasý merzimi jyldaǵy mejesinen bir apta erte bastaldy. Oblys ákimi Berdibek Saparbaev kóktemgi sý tasqynyna qatysty ahýaldy bilip, aldaǵy atqarylar sharalardy belgileý úshin Qarǵaly, Aqtóbe jáne Sazdy sý qoımalary aýmaqtaryn aralap, jaǵdaımen tanysty.
Qazirgi ýaqytta atalǵan sý qoımalarynyń barlyǵy derlik qardyń erigen sýyn qabyldaıtyn múmkindikteri bar. Oblystyń soltústik óńirlerindegi Mártók, Hromtaý, Qarǵaly, Áıteke bı aýdandarynda jáne Aqtóbe qalasy aýmaǵynda ǵana qar qalyp otyr. Qardyń qalyńdyǵy 5-87 santımetr shamasynda dep eseptelýde.
Oblystyq tótenshe jaǵdaılar jónindegi departamenttiń basshysy Baýyrjan Syzdyqov, «Qazsýshar» RMK Aqtóbe fılıalynyń dırektory Bekzat Námetov ózderi jetekshilik etetin salalar boıynsha júzege asyrylyp jatqan jumystar jóninde baıandap berdi.
Oblys boıynsha aqpan aıynan bastap sý tasqynyna qarsy jumystar tııanaqty júrgizilip jatyr. Sý aǵatyn aryqtardy tazalaý, ózenderdiń arnasyn keńeıtý qolǵa alyndy.
Berdibek Saparbaev Qarǵaly aýdanynda bolǵan sátinde osy óńirdegi qaýipti aımaqtardyń biri Qosestek aýylynyń kóktemgi sý tasqynyna ázirligimen tanysty. Aýdan ákimi Rahat Sydyqov jergilikti jerde atqarylǵan sharalar týraly baıandady. Aǵymdaǵy jyly kóktemgi sý tasqyny qaýpiniń aldyn alý maqsatynda «Qazsýshar» RMK Aqtóbe fılıaly sý sharýashylyǵy nysandarynda kótergish mehanızmderine, sý torabyndaǵy elektr júıelerine tekserister júrgizip, janar-jaǵarmaı jáne apattyq materıaldar qoryn daıyndady. Rezervke apattyq dızel elektr stansa ázirlendi. Barlyq respýblıkalyq menshiktegi nysandar tehnıkalyq tekserýden ótkizildi. Nysandarda turaqty baılanys júıeleri jumys isteıdi.
Satybaldy SÁÝIRBAI,
«Egemen Qazaqstan».
Aqtóbe oblysy.