QARAǴANDY. 8 sáýir. Búgin qazaqstandyq bylǵary qolǵap sheberi Gennadıı Golovkın 34 jasqa toldy. Bul týraly egemen.kz tilshisi habarlady.
Gennadıı Golovkın Qaraǵandy oblysyndaǵy Maıqudyq eldi mekeninde kenshi men hımııalyq zerthana qyzmetkeriniń otbasynda dúnıege keldi. Boksqa aǵalarynyń aıtýymen barǵan. Mektepti bitirgen soń E. Bóketov atyndaǵy QarMÝ-dyń dene tárbıesi fakýltetine oqýǵa tústi.
2003 jyly áýesqoılar arasynda álem chempıony atansa, 2004 jyly Olımpıada oıyndarynyń kúmis júldegeri boldy. Keıin kásipqoı boksqa aýysyp, orta salmaqta WBA, IBF, IBO jáne WBC (ýaqytsha) tujyrymdary boıynsha chempıondyq ataqtardy jeńip aldy. The Ring jýrnalynyń málimetine sáıkes, salmaq dárejelerine qaramastan álemdegi eń úzdik úsh boksshynyń biri.
Gennadıı Golovkın «Parasat» jáne «Qurmet» ordenderimen marapattalǵan. Taıaýda boksshy «EKSPO-2017» kórmesiniń resmı elshisi atandy.
Qaırat Ábildınov.
Derek, foto: egemen.kz.