Qostanaı aýdanyndaǵy Sýrıkov aýyly túgelge jýyq sýdyń astynda qaldy.
Al qar sýy aýyldyń ishine aptanyń basynda kire bastaǵan. Kóktem kesh shyǵyp, bıyl túsken qalyń qardyń kóbesi sógile qoımaǵan soń, aýyl adamdary sýda qalamyz dep oılamaǵan. Sońǵy kúnderi kún kúrt jylynǵanda aýylǵa aqqan qarǵyn sýdyń qarqynyna qarsy turý múmkin bolmady.
– Tańerteń sıyr saýýǵa tursam, buzaý men sıyrym sýda tur. Sıyrdy qurǵaqtaý jerge jetelep júrgenimde sý da qorany túgel jaılady, odan úıge kirdi, – deıdi aýyl turǵyny Oksana Shıpılova. Sýrıkov aýylynyń turǵyndary aýyldyq okrýg, aýdan basshylaryna dabyl qaqty. Olar jáne Tótenshe jaǵdaılar departamentinen qyzmetkerler jetkenshe sý toqtaýsyz kóterile berdi.
Jyldam erigen qar sýy boı bermeı, az ǵana ýaqyttyń ishinde úılerdiń terezesinen kirdi, keıbir úıler men mal qorasynyń shatyry ǵana kórinedi. Soltústik aımaqtyq aeromobıldik jedel-qutqarý jáne Batys Qazaqstan oblysynan kómekke kelgen jasaqtar aýyldaǵy barlyq maldy qurǵaqqa shyǵaryp úlgerdi. Aýyl adamdary búkil dúnıe-múlki sýda qalsa da, malynyń aman qalǵanyna shúkirshilik etip otyr. О́ıtkeni, aýyl túgeldeı tek óz qorasyndaǵy maldyń ónimimen kún kóredi. Saýǵan sútin Qostanaı qalasyndaǵy «Novyı den» sút zaýytyna ótkizedi. Aýyl sýda qalǵaly zaýyttyń sút tasıtyn mashınasy da kele almaı otyr. Aýyldyń qystan qalǵan jem-shóbi sýda qaldy.
Aýyldaǵy kónekózderdiń aıtýynsha, Sýrıkov aýylyna bul 70 jyldan asa ýaqyttan keıin kelip otyrǵan sý kórinedi. Jut jalǵyz bolmaıdy degendeı, soǵys bastalǵan 1941 jyly bul eldi mekendi sý basqan eken.
– Aýyl turǵyndarynyń shyǵyny eldi meken tolyq sýdan tazartylǵan soń esepteletin bolady, ony óteý úshin aýdandaǵy rezervtik qordan 21 mıllıon teńge qarjy tabylady. Jetpegenine oblys bıýdjetinen bólinedi, – dedi Qostanaı aýdanynyń ákimi Táýba Isabaev. – Qazir sýdyń beti qaıtty. Aýyl ishindegi sýdy sorǵymen soryp, Shynsaı saıy arqyly Tobyl ózenine quıý jumysy jalǵasýda.
Názıra JÁRIMBETOVA,
«Egemen Qazaqstan»
Qostanaı oblysy,
Qostanaı aýdany,
Sýrıkov aýyly