Lotereıalar jáne lotereıa qyzmeti týraly
Osy Zań Qazaqstan Respýblıkasynda lotereıa jáne lotereıa qyzmeti salasyndaǵy qoǵamdyq qatynastardy retteıdi, ony uıymdastyrý men ótkizýdiń tártibi men sharttaryn aıqyndaıdy, lotereıa jáne lotereıa qyzmeti salasyndaǵy memlekettik retteýdiń uıymdyq negizderin belgileıdi.
1-taraý. JALPY EREJELER
1-bap. Osy Zańda paıdalanylatyn negizgi uǵymdar
Osy Zańda mynadaı negizgi uǵymdar paıdalanylady:
1) bas júlde – tırajdyń utys oıynyn ótkizý barysynda oınatylmaǵan jáne lotereıany ótkizý sharttaryna sáıkes bir tırajdan kelesi tırajǵa aýysatyn tırajdyq lotereıanyń júlde qorynyń bir bóligi;
2) júlde qory – lotereıa bıletterin, túbirtekterin nemese ózge de qujattardy ótkizý jáne (nemese) lotereıa mólsherlemelerin tirkeý esebinen ne lotereıa operatorynyń derbes qarajaty esebinen qalyptastyrylatyn jáne lotereıaǵa qatysýshylarǵa utys túrinde tólenetin aqsha jáne (nemese) ózge de múlik;
3) júlde qorynyń utys oıyny – lotereıa bıletterin, túbirtekterin nemese ózge de qujattardy ótkizgennen jáne (nemese) lotereıa mólsherlemelerin tirkegennen keıin júrgiziletin jáne utqan lotereıaǵa qatysýshyny (qatysýshylardy) anyqtaýǵa baǵyttalǵan prosess;
4) lotereıa – osy Zańǵa, lotereıany ótkizý talaptaryna jáne sharttaryna sáıkes ótkiziletin, eger ol lotereıany ótkizý sharttaryna sáıkes utqan dep tanylatyn bolsa, bir tarap (lotereıa operatory) júlde qorynyń utys oıynyn ótkizetin, al ekinshi tarap (lotereıaǵa qatysýshy) utysqa quqyq alatyn oıyn. Kommersııalyq uıymdardyń taýarlardy (kórsetiletin qyzmetterdi) satýyn yntalandyrýǵa baǵyttalǵan júldelerdiń utys oıyny lotereıa bolyp tabylmaıdy;
5) lotereıalyq aqparatty óńdeý ortalyǵy – baılanys jelilerine qosylǵan jáne qabyldanǵan lotereıa mólsherlemelerin tirkeýge, taratylǵan lotereıa bıletteri, túbirtekter nemese ózge de qujattar, tirkelgen lotereıa mólsherlemeleri, ótkizilgen lotereıa bıletterinen, túbirtekterden nemese ózge de qujattardan túsken túsim, tólengen utystar týraly aqparatty alýǵa, saqtaýǵa jáne esepke alýǵa jáne ony lotereıa operatorynan lotereıalyq eseptilik ortalyǵyna berýge arnalǵan apparattyq-baǵdarlamalyq keshen;
6) lotereıa bıleti, túbirtek nemese ózge de qujat – lotereıany ótkizý sharttarynda kózdelgen, lotereıaǵa qatysý quqyǵyn kýálandyratyn, onyń ishinde elektrondyq nysandaǵy qujat;
7) lotereıa eseptiliginiń ortalyǵy – baılanys jelileri arqyly lotereıa aqparatyn óńdeý ortalyǵyna qosylǵan, taratylǵan lotereıa bıletteri, túbirtekter nemese ózge de qujattar, tirkelgen lotereıa mólsherlemeleri týraly, ótkizilgen lotereıa bıletterinen, túbirtekterden nemese ózge de qujattardan túsken túsim, tólengen utystar týraly aqparatty lotereıa operatorynan ýaqtyly alýǵa múmkindik beretin apparattyq-baǵdarlamalyq keshen;
8) lotereıa jabdyǵy – utys kombınasııasyn anyqtaýǵa arnalǵan qurylǵy nemese qurylǵylar (kezdeısoq sandardyń generatory, mehanıkalyq, elektrlik, elektrondyq nemese ózge de tehnıkalyq qurylǵylar);
9) lotereıalar jáne lotereıa qyzmeti salasyndaǵy ýákiletti organ (budan ári – ýákiletti organ) – lotereıalar jáne lotereıa qyzmeti salasyndaǵy basshylyqty júzege asyratyn ortalyq atqarýshy organ;
10) lotereıa kombınasııasy – lotereıany ótkizý sharttarynda kózdelgen, lotereıa bıletinde, túbirtekte nemese ózge de qujatta kórsetilgen nyshandar (jazbalar, sandar, belgiler, sýretter) jıyntyǵy;
11) lotereıaǵa qatysýshy – júlde qorynyń utys oıynyna qatysý quqyǵyn beretin lotereıa bıletin, túbirtekti nemese ózge de qujatty ıelengen, on segiz jasqa tolǵan jeke tulǵa;
12) lotereıa mólsherlemesi – aqysy tólengen bir lotereıa kombınasııasynyń quny;
13) lotereıa operatory – lotereıalardy júrgizý jónindegi qyzmetti júzege asyratyn, Qazaqstan Respýblıkasynyń Úkimeti aıqyndaıtyn zańdy tulǵa;
14) lotereıany ótkizý – lotereıa bıletterin, túbirtekterdi nemese ózge de qujattardy daıyndaý ne olardy daıyndaýǵa arnalǵan sharttardy jasasý, sondaı-aq lotereıalyq jabdyqty jáne lotereıany ótkizý úshin qajetti ózge de jabdyqty, baǵdarlamalyq ónimderdi daıyndaýshymen sharttardy jáne (nemese) lotereıany ótkizý úshin qajetti ózge de sharttardy (kelisimsharttardy) jasasýdy, lotereıa bıletterin, túbirtekterdi nemese ózge de qujattardy taratý men esepke alýdy, júlde qorynyń utysyn oınatýdy, utys shyqqan lotereıa bıletterine, túbirtekterge nemese ózge de qujattarǵa saraptama jasaýdy, lotereıaǵa qatysýshylarǵa utystardy tóleýdi, lotereıany ótkizý úshin qajetti ózge de is-qımyl men is-sharalardy júzege asyrýdy qamtıtyn is-sharalardy júzege asyrý;
15) lotereıa termınaly – lotereıa mólsherlemelerin qabyldaýǵa (lotereıa kombınasııalaryn tańdaýǵa ne engizýge) jáne (nemese) lotereıa bıletterin, túbirtekterdi nemese ózge de qujattardy ótkizýge (resimdeýge) arnalǵan jabdyq;
16) mezettik lotereıa – utystardy aıqyndaýǵa múmkindik beretin nyshandar (jazbalar, sandar, belgiler, sýretter) jıyntyǵy, lotereıa bıletterin, túbirtekterdi nemese ózge de qujattardy daıyndaý satysynda jáne olar lotereıaǵa qatysýshylar arasynda ótkizilgenge deıin nemese lotereıalyq mólsherlemelerdi qabyldaýǵa deıin salynatyn lotereıa túri. Mezettik lotereıany ótkizý kezinde mundaı lotereıaǵa qatysýshy lotereıa bıletin, túbirtekti nemese ózge de qujatty tólegennen keıin jáne lotereıa bıletin, túbirtekti nemese ózge de qujatty bergennen (resimdegennen) keıin tikeleı óz utysynyń bar ekenin jáne mólsherin nemese onyń joq ekenin aıqyndaıdy;
17) tıraj – lotereıany ótkizý sharttaryna sáıkes júlde qorynyń (júlde qorynyń bir bóliginiń) utys oıynyna qatysatyn ótkizilgen lotereıa bıletteriniń, túbirtekterdiń nemese ózge de qujattardyń, tirkelgen lotereıa mólsherlemeleriniń sany;
18) tırajdyq lotereıa – lotereıaǵa qatysýshylar arasynda júlde qorynyń utys oıyny lotereıa jabdyǵyn paıdalaný arqyly lotereıa bıletteri, túbirtekter nemese ózge de qujattar ótkizilgennen jáne (nemese) lotereıa mólsherlemeleri tirkelgennen keıin bir mezgilde ótkiziletin lotereıa túri;
19) utys – lotereıa operatory lotereıany ótkizý sharttaryna sáıkes jeńimpaz dep tanylǵan lotereıaǵa qatysýshyǵa lotereıany ótkizý sharttaryna sáıkes mólshermen jáne nysanda (aqshamen nemese zattaı) tóleıtin júlde qorynyń bir bóligi.
2-bap. Qazaqstan Respýblıkasynyń lotereıalar jáne lotereıa qyzmeti týraly zańnamasy
1. Qazaqstan Respýblıkasynyń lotereıalar jáne lotereıa qyzmeti týraly zańnamasy Qazaqstan Respýblıkasynyń Konstıtýsııasyna negizdeledi jáne osy Zańnan jáne Qazaqstan Respýblıkasynyń ózge de normatıvtik quqyqtyq aktilerinen turady.
2. Eger Qazaqstan Respýblıkasy ratıfıkasııalaǵan halyqaralyq shartta osy Zańda qamtylǵannan ózge qaǵıdalar belgilense, onda halyqaralyq sharttyń qaǵıdalary qoldanylady.
3-bap. Lotereıa jáne lotereıa qyzmeti salasyndaǵy negizgi qaǵıdattar
Lotereıa jáne lotereıa qyzmeti salasyndaǵy negizgi qaǵıdattar:
1) lotereıaǵa qatysýshylardyń utysqa múmkindikteriniń teńdigi boljanatyn, lotereıaǵa qatysý sharttarynyń teńdigin qamtamasyz etý;
2) lotereıany ótkizý sharttarynyń jáne tırajdyq lotereıalardyń júlde qorynyń utys oıyny nátıjeleriniń mindetti túrde jarııalanýy boljanatyn jarııalylyqty qamtamasyz etý bolyp tabylady.
4-bap. Lotereıaǵa qatysýshylar quqyqtarynyń kepildikteri
1. Lotereıa operatory men lotereıaǵa qatysýshy arasyndaǵy shart lotereıaǵa qatysýshy lotereıa bıletiniń, túbirtektiń nemese ózge de qujattyń qunyn, lotereıa mólsherlemesin tólegen jáne lotereıa bıletin, túbirtekti nemese ózge de qujatty bergen (resimdegen) kezden bastap jasalǵan dep tanylady.
2. Lotereıa bıletin, túbirtekti nemese ózge de qujatty satyp alý azamattyq-quqyqtyq mindettemeniń týyndaýyna negiz bolady, oǵan sáıkes lotereıaǵa qatysýshy lotereıa operatorynan mynalardy:
1) lotereıany ótkizý sharttaryn saqtaýdy;
2) utysty tóleýdi talap etýge quqyly.
3. Lotereıaǵa qatysýshy lotereıa operatorynyń sheshimderin jáne áreketterin (áreketsizdigin) sotta daýlaýǵa quqyly.
4. Lotereıa operatorynyń Qazaqstan Respýblıkasynyń zańdarynda kózdelgen jaǵdaılardy qospaǵanda, lotereıany utqan qatysýshy týraly málimetterdi, eger onyń jazbasha kelisimi alynbasa, jarııa etýge quqyǵy joq.
5. Lotereıa operatory mártebesinen aıyrylǵan jaǵdaıda, lotereıa operatory lotereıa bıletterin, túbirtekterdi nemese ózge de qujattardy taratýdy (ótkizýdi), lotereıa mólsherlemelerin qabyldaýdy jáne tirkeýdi toqtatýǵa, bul týraly lotereıaǵa qatysýshylardy merzimdi baspasóz basylymdary jáne lotereıa operatorynyń ınternet-resýrsy arqyly habardar etýge, utys oıyny ótkizilgen tıisti lotereıa boıynsha utystarǵa úsh aı ishinde tólem júrgizýge jáne júlde qorynyń utys oıyny ótkizilmegen, satylǵan lotereıa bıletteri, túbirtekteri nemese ózge de qujattar úshin aqshany qaıtarýǵa mindetti.
5-bap. Lotereıalardyń túrleri
1. Lotereıa ony ótkizý tásiline qaraı mynadaı:
1) mezettik;
2) tırajdyq túrlerge bólinedi.
2. Osy Zańda kózdelgen tártippen uıymdastyrylatyn jáne ótkiziletin lotereıalardy qospaǵanda, Qazaqstan Respýblıkasynda ózgeshe lotereıalardy uıymdastyrýǵa jáne ótkizýge tyıym salynady.
3. Qumar oıyndardy jáne (nemese) bás tigýdi lotereıa túrinde ótkizýge jol berilmeıdi.
4. Lotereıa operatory bolyp tabylmaıtyn tulǵanyń lotereıa ótkizýine tyıym salynady.
2-taraý. LOTEREIа JÁNE LOTEREIа QYZMETI SALASYNDAǴY MEMLEKETTIK RETTEÝ
6-bap. Qazaqstan Respýblıkasy Úkimetiniń quzyreti
Qazaqstan Respýblıkasynyń Úkimeti:
1) lotereıa jáne lotereıa qyzmeti salasyndaǵy memlekettik saıasattyń negizgi baǵyttaryn ázirleıdi jáne olardy júzege asyrýdy uıymdastyrady;
2) ýákiletti organdy aıqyndaıdy;
3) lotereıa operatoryn jáne oǵan lotereıa ótkizý quqyǵyn berý merzimin aıqyndaıdy;
4) ózine Qazaqstan Respýblıkasynyń Konstıtýsııasymen, zańdarymen jáne Qazaqstan Respýblıkasy Prezıdentiniń aktilerimen júktelgen ózge de fýnksııalardy atqarady.
7-bap. Ýákiletti organnyń quzyreti
Ýákiletti organ:
1) lotereıa jáne lotereıa qyzmeti salasyndaǵy memlekettik saıasatty iske asyrýdy júzege asyrady;
2) lotereıalar jáne lotereıa qyzmeti týraly Qazaqstan Respýblıkasy zańnamasynyń saqtalýyna memlekettik baqylaýdy júzege asyrady;
3) Qazaqstan Respýblıkasynyń Kásipkerlik kodeksine sáıkes táýekeldi baǵalaýdyń ólshemsharttaryn, tekserý paraqtaryn ázirleıdi jáne bekitedi;
4) osy Zańmen, Qazaqstan Respýblıkasynyń ózge de zańdarymen, Qazaqstan Respýblıkasy Prezıdentiniń jáne Qazaqstan Respýblıkasy Úkimetiniń aktilerimen kózdelgen ózge de ókilettikterdi júzege asyrady.
3-taraý. LOTEREIаNY О́TKIZÝ
8-bap. Lotereıa operatoryna qoıylatyn jalpy talaptar
1. Lotereıa operatorynyń lotereıa ótkizýden basqa kásipkerlik qyzmettiń ózge de túrlerimen aınalysýǵa quqyǵy joq.
2. Myna:
1) Qazaqstan Respýblıkasynyń zańnamasyna sáıkes qarjy-sharýashylyq qyzmeti toqtatyla turǵan;
2) terrorızmdi jáne ekstremızmdi qarjylandyrýmen baılanysty uıymdar tizbesine Qazaqstan Respýblıkasynyń zańnamasynda belgilengen tártippen engizilgen;
3) atqarýshylyq qujattar boıynsha oryndalmaǵan mindettemeleri bar jáne atqarýshylyq qujattardyń oryndalýyn qamtamasyz etý salasyndaǵy ýákiletti organ boryshkerlerdiń tıisti tizilimine engizgen;
4) quryltaıshylary (qatysýshylary) jáne (nemese) atqarýshy organy jáne (nemese) olardyń úlestes tulǵasy ýákiletti organ basshylarynyń jaqyn týystary, jubaıy (zaıyby) nemese jekjattary bolyp tabylatyn;
5) quryltaıshylary (qatysýshylary) jáne (nemese) atqarýshy organy jáne (nemese) olardyń úlestes tulǵasy ekonomıka salasyndaǵy qylmysy úshin ne aýyrlyǵy ortasha qasaqana qylmysy, aýyr qylmysy, asa aýyr qylmysy úshin alynbaǵan nemese ótelmegen sottalǵandyǵy bar jáne (nemese) terrorızmdi jáne ekstremızmdi qarjylandyrýmen baılanysty tulǵalar tizbesine Qazaqstan Respýblıkasynyń zańnamasynda belgilengen tártippen engizilgen tulǵalar bolyp tabylatyn zańdy tulǵalar lotereıa operatory retinde áreket ete almaıdy.
3. Lotereıa operatory ýákiletti organda lotereıa eseptiliginiń ortalyǵyn ornalastyrýdy qamtamasyz etýge tıis.
Lotereıa operatory lotereıa aqparatyn óńdeý ortalyǵy arqyly taratylǵan lotereıa bıletteri, túbirtekter nemese ózge de qujattar, tirkelgen lotereıa mólsherlemeleri, ótkizilgen lotereıa bıletterinen, túbirtekterden nemese ózge de qujattardan túsken túsim, tólengen oıyn utystary týraly aqparatty jınaýdy, qalyptastyrýdy, saqtaýdy jáne esepke alýdy jáne ony lotereıa eseptiliginiń ortalyǵyna aıyna bir retten sıretpeı usynýdy qamtamasyz etýge tıis.
9-bap. Lotereıa termınalyna, lotereıalyq aqparatty óńdeý ortalyǵyna, lotereıa eseptiliginiń ortalyǵyna, lotereıa jabdyǵyna qoıylatyn talaptar
1. Lotereıa termınaldary «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksine (Salyq kodeksine) sáıkes modelderi baqylaý-kassa mashınalarynyń memlekettik tizilimine engizilgen baqylaý-kassa mashınalarymen jaraqtandyrylýǵa tıis.
Lotereıa termınaldary, tólem kózinen jeke tabys salyǵyn ustap qalýdy esepke ala otyryp, utystardy tóleýdi júzege asyrý múmkindigin de kózdeı alady.
2. Lotereıalyq aqparatty óńdeý ortalyǵy Qazaqstan Respýblıkasynyń aýmaǵynda ornalasýǵa tıis.
Lotereıalyq aqparatty óńdeý ortalyǵy men lotereıa eseptiliginiń ortalyǵy aqparatty joǵalýdan, urlanýdan, burmalanýdan, jalǵan aqparat jasaýdan, ruqsatsyz qoljetimdilikten jáne ony taratý, buǵattaý, joıý, túrlendirý, kóshirý jónindegi áreketterden jáne ózge de zańsyz áreketterden qorǵaýdy qamtamasyz etýge tıis.
3. Lotereıa jabdyǵynyń tehnıkalyq sıpattamalary júlde qoryn utys oıynyna salý kezinde utystardy bólýdiń kezdeısoq bolýyn qamtamasyz etýge tıis.
4. Lotereıa jabdyǵynyń júlde qorynyń utys oıynyn ótkizý nátıjelerin osyndaı utys oıyny bastalǵanǵa deıin aldyn ala aıqyndaýǵa múmkindik beretin jasyryn múmkindikteri jáne (nemese) rásimderi men algorıtmderi bolmaýǵa tıis.
5. Lotereıa jabdyǵy lotereıa mólsherlemesin qabyldaýdy jáne tirkeýdi qamtamasyz etpeýge tıis, sondaı-aq baılanys jelisi arqyly lotereıa termınaldarymen qosylmaýǵa tıis.
10-bap. Lotereıany ótkizý sharttary
1. Lotereıany ótkizý sharttaryn lotereıa operatory ázirleıdi jáne bekitedi.
2. Lotereıany ótkizý sharttary mynadaı málimetterdi:
1) lotereıanyń ataýyn;
2) lotereıa túriniń kórsetilýin;
3) ornalasqan jeri, banktik derektemeleri, bıznes sáıkestendirý nómiri kórsetilgen lotereıa operatorynyń ataýyn;
4) lotereıa ótkiziletin merzimderdi;
5) lotereıa tujyrymdamasynyń sıpattamasyn;
6) lotereıanyń uıymdastyrýshylyq-tehnologııalyq sıpattamasyn;
7) lotereıaǵa qatysýshylardyń quqyqtary men mindetterin;
8) utty dep tanylǵan lotereıaǵa qatysýshyǵa utysty tóleý tártibi men merzimderin, sondaı-aq utys shyqqan lotereıa bıletterine, túbirtekterge nemese ózge de qujattarǵa saraptama júrgizý merzimderin;
9) lotereıaǵa qatysýshylardy lotereıaǵa qatysý qaǵıdalary jáne júlde qoryn utysqa salý nátıjeleri týraly habardar etý tártibin;
10) lotereıa bıletterin, túbirtikterdi nemese ózge de qujattardy taratý (ótkizý), lotereıa mólsherlemelerin qabyldaý men tirkeý tártibin;
11) lotereıa bıletiniń, túbirtektiń nemese ózge de qujattyń (lotereıa mólsherlemeleriniń mólsherin) baǵasyn;
12) utystyń mólsheri men nysanyn (aqshalaı nemese zattaı);
13) júlde qorynyń josparlanyp otyrǵan mólsherin;
14) júlde qorynyń utys oıynyn ótkizý tártibin, utystardy aıqyndaý algorıtmin, bas júldeni (bar bolsa) qalyptastyrý men utysqa salý qaǵıdalaryn qamtýǵa tıis.
3. Lotereıa operatory bekitilgen lotereıany ótkizý sharttarynyń tupnusqa danasyn ony ótkizý bastalǵanǵa deıin kúntizbelik on kúnnen keshiktirmeı ýákiletti organǵa jiberýge jáne lotereıany ótkizý sharttaryn ony ótkizý bastalǵanǵa deıin kúntizbelik bir kúnnen keshiktirmeı óziniń ınternet-resýrsynda ornalastyrýǵa mindetti.
11-bap. Júlde qoryn qalyptastyrý jáne bólý
1. Lotereıa operatory ótkizilgen lotereıa bıletterinen, túbirtekterden nemese ózge de qujattardan, naqty lotereıanyń tirkelgen lotereıa mólsherlemelerinen túsken túsimniń keminde elý paıyzy mólsherinde júlde qoryn qalyptastyrýdy qamtamasyz etýge mindetti.
2. Júlde qory osy bapqa jáne lotereıany ótkizý sharttaryna sáıkes qalyptastyrylady.
3. Tırajdyq lotereıanyń júlde qory ony utys oıynyna salý bastalǵanǵa deıin qalyptastyrylady.
4. Lotereıa operatoryna, lotereıaǵa qatysýshylar aldyndaǵy utystardy tóleý jónindegi mindettemelerdi qospaǵanda, júlde qoryna qandaı da bir mindettemelermen aýyrtpalyq salýǵa, sondaı-aq júlde qorynyń qarajatyn utystardy tóleýden basqaǵa paıdalanýǵa tyıym salynady.
5. Júlde qoryn (bas júldeni) birneshe tıraj boıyna jınaqtap qalyptastyrý qaǵıdaty ótkizý sharttarynda paıdalanylatyn tırajdyq lotereıany qospaǵanda, tırajdyq lotereıanyń júlde qory oǵan qatysy bar tıraj sheńberinde tolyǵymen utysqa salynýǵa tıis.
6. Utystardy tóleý osy Zańǵa jáne lotereıany ótkizý sharttaryna sáıkes júzege asyrylady.
Utystardy tóleý tıisti tıraj ótkizilgennen keıin otyz kún merzimnen keshiktirilmeı bastalýǵa jáne osy tırajdyń (júlde qoryn utysqa salýdyń) nátıjeleri jarııalanǵan kezden bastap keminde alty aı boıy jalǵasýǵa tıis. Bul merzim aıaqtalǵan soń talap etilmegen utystar boıynsha narazylyqtar lotereıany ótkizý sharttarynda kózdelgen tártippen qabyldanady.
7. Lotereıa operatory lotereıa ótkizý sharttarynda belgilengen merzimde talap etilmegen utystardy tıisti tırajdyń nátıjesi (júlde qoryn utysqa salý) jarııalanǵan kezden bastap úsh jyl boıy saqtaıdy, odan keıin olar salyqtyq emes tólem túrinde bıýdjet kirisine esepke jatqyzylady.
12-bap. Lotereıa bıletterine, túbirtekterge nemese ózge de qujattarǵa qoıylatyn talaptar
1. Lotereıa bıletterinde, túbirtekterde nemese ózge de qujattarda mynadaı mindetti aqparat:
1) lotereıanyń ataýy;
2) lotereıa operatorynyń ataýy, ornalasqan jeri, telefon nómirleri jáne ınternet-resýrsy;
3) tırajdyń nómiri nemese ataýy (tırajdyq lotereıalar úshin);
4) lotereıa bıletiniń, túbirtektiń nemese ózge de qujattyń nómiri;
5) lotereıa bıletiniń, túbirtektiń nemese ózge de qujattyń baǵasy;
6) júlde qorynyń utys oıynyn ótkizý kúni men orny (tırajdyq lotereıa úshin);
7) utysty alý orny men merzimderi týraly derekter;
8) júlde qorynyń mólsheri qamtylýǵa tıis.
2. Lotereıa bıletterindegi, túbirtekterdegi nemese ózge de qujattardaǵy aqparat Qazaqstan Respýblıkasy tilder týraly zańnamasynyń talaptaryna saı bolýǵa tıis.
3. Lotereıa bıletiniń, túbirtektiń nemese ózge de qujattyń elektrondyq nysany elektrondyq sıfrlyq qoltańba arqyly kýálandyrýdy talap etpeıdi.
13-bap. Júlde qorynyń utys oıynyn ótkizýge qoıylatyn talaptar
1. Júlde qorynyń utys oıynyn ótkizý osy Zańǵa jáne lotereıany ótkizý sharttaryna sáıkes júzege asyrylady.
2. Tırajdyq lotereıanyń júlde qorynyń utys oıynyn lotereıaǵa qatysýshy óz utysyn anyqtaý maqsatynda generasııalaý arqyly kezdeısoq utqan lotereıa kombınasııasyn osy utys oıynyndaǵy lotereıa kombınasııasymen salystyrýǵa tıis lotereıa jabdyǵy júzege asyrady.
3. Tırajdyq lotereıanyń júlde qorynyń utys oıynyn ótkizý kezinde lotereıa operatory tırajdyq komıssııa qurady.
Tırajdyq komıssııanyń quramyna qoǵamdyq birlestikterdiń nemese ózge de kommersııalyq emes uıymdardyń ókilderi engizilýge tıis.
4. Tırajdyq komıssııanyń mindetteri:
1) tırajdyń utys oıynyna qatysatyn lotereıa bıletteriniń, túbirtekterdiń nemese ózge de qujattardyń jáne (nemese) tirkelgen lotereıa mólsherlemeleriniń sanyn rastaý;
2) tırajdy ótkizý nátıjelerin rastaý.
Tırajdy ótkizý nátıjelerin rastaý tırajdyq komıssııa músheleriniń tırajdyq komıssııa hattamasyna jáne tırajdy ótkizý nátıjeleriniń resmı kestesine qol qoıý arqyly tirkeledi.
5. Lotereıa operatory utystardy aıqyndaý rásimin kórsete otyryp, tırajdyq lotereıanyń júlde qorynyń utys oıynyn telearnada tikeleı efırde nemese ınternet jelisinde translıasııalaýdy qamtamasyz etedi.
6. Júlde qorynyń árbir utys oıynyn jáne lotereıa bıletteri, túbirtekter nemese ózge de qujattar, tırajdyq lotereıanyń tirkelgen lotereıa mólsherlemeleri boıynsha utystardyń nátıjelerin lotereıa operatory kórsetilgen utys oıyny ótkizilgen kezden bastap úsh jumys kúni ishinde Qazaqstan Respýblıkasynyń búkil aýmaǵynda taralatyn merzimdi baspasóz basylymdarynda jarııalaıdy nemese on eki saǵat ishinde lotereıa operatorynyń ınternet-resýrsynda ornalastyrady.
7. Tırajdyq lotereıany ótkizý toqtatylǵan jaǵdaıda, bas júldeni qosa alǵanda, onyń júlde qory tolyq oınatylýǵa tıis.
8. Mezettik lotereıanyń júlde qorynyń utys oıyny:
1) lotereıaǵa qatysýshynyń lotereıa bıletin, túbirtek nemese ózge de qujatta daıyndaý kezeńinde oǵan salynǵan jasyryn lotereıa kombınasııasyn anyqtaýynan;
2) lotereıaǵa qatysýshy anyqtaǵan aqparatty lotereıany ótkizý sharttarymen salystyryp-tekserýden turady.
9. Mezettik lotereıanyń júlde qorynyń mundaı utys oıynyn ótkizý nátıjesin utys oıyny bastalǵanǵa deıin aldyn ala aıqyndaýǵa múmkindik beretin rásimder men algorıtmderdi paıdalanýǵa tyıym salynady.
14-bap. Lotereıadan aýdarymdar
Lotereıa operatory ótkizilgen lotereıa bıletterinen, túbirtekterden nemese ózge de qujattardan, tirkelgen lotereıa mólsherlemelerinen túsken túsim men júlde qory arasyndaǵy aıyrmanyń keminde on paıyzyn sportty damytýǵa toqsan saıyn baǵyttaýǵa mindetti.
4-taraý. QAZAQSTAN RESPÝBLIKASYNYŃ LOTEREIаLAR JÁNE LOTEREIа QYZMETI TÝRALY ZAŃNAMASYN BUZǴANY ÚShIN JAÝAPTYLYQ. QAZAQSTAN RESPÝBLIKASYNYŃ LOTEREIаLAR JÁNE LOTEREIа QYZMETI TÝRALY ZAŃNAMASYNYŃ SAQTALÝYNA MEMLEKETTIK BAQYLAÝ
15-bap. Qazaqstan Respýblıkasynyń lotereıalar jáne lotereıa qyzmeti týraly zańnamasyn buzǵany úshin jaýaptylyq
Qazaqstan Respýblıkasynyń lotereıalar jáne lotereıa qyzmeti týraly zańnamasyn buzý Qazaqstan Respýblıkasynyń zańdarynda belgilengen jaýaptylyqqa alyp keledi.
16-bap. Qazaqstan Respýblıkasynyń lotereıalar jáne lotereıa qyzmeti týraly zańnamasynyń saqtalýyna memlekettik baqylaý
1. Qazaqstan Respýblıkasynyń lotereıalar jáne lotereıa qyzmeti týraly zańnamasynyń saqtalýyna memlekettik baqylaý tekserý nysanynda júzege asyrylady.
2. Tekserý Qazaqstan Respýblıkasynyń Kásipkerlik kodeksine sáıkes júzege asyrylady.
5-taraý. QORYTYNDY JÁNE О́TPELI EREJELER
17-bap. О́tpeli erejeler
Lotereıalardy uıymdastyrý jáne ótkizý salasyndaǵy qyzmetti júzege asyratyn lısenzıattar osy Zań qoldanysqa engizilgen kúnnen bastap alty aı ishinde bas júldelerdi qosa alǵanda, tıisti lotereıalardyń júlde qorlaryn tolyq utysqa salý, utystardy tóleýdi júrgizýge jáne júlde qoryn oınatý ótkizilmegen, satylǵan lotereıa bıletteri, túbirtekter nemese ózge de qujattar úshin aqshany qaıtarýǵa mindetti.
18-bap. Osy zańdy qoldanysqa engizý tártibi
Osy Zań kúshine engizilgen kúnnen bastap alty aı ótken soń qoldanysqa engiziletin osy Zańnyń 5-babynyń 2 jáne 4-tarmaqtaryn qospaǵanda, osy Zań alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi.
Qazaqstan Respýblıkasynyń Prezıdenti
N.NAZARBAEV
Astana, Aqorda, 2016 jylǵy 9 sáýir
№ 495-V QRZ