QARAǴANDY. 21 sáýir. Temirtaý qalasynda bes qabatty úıdiń qaptalyna tutastaı graffıtı úlgisimen sýret salǵan belgisiz avtordyń óneri qala turǵyndaryn ǵana emes, jeli qoldanýshylaryn da tánti etti. Bul týraly egemen.kz tilshisi habarlady.
Belgisiz sýretshi bir túnniń ishinde Temirtaýdyń 9-shy yqsham aýdanyndaǵy №96 turǵyn úıdiń qaptal qabyrǵasyna Fransııanyń áıgili sýretshisi Anrı Matısstiń «Bı» dep atalatyn kartınasyn kóshirip salǵan. Kartınaǵa engizilgen bir ǵana ózgeris – graffıtı sýrette bıshiler tútini býdaqtap jatqan alyp murjany aınala bı bılep júr.
Kóp uzamaı graffıtı sýretti salǵan Pavel Kas degen qazaqstandyq strıt-art-sýretshi ekeni anyqtaldy. Ol óziniń mundaı áreketke qaladaǵy ekologııalyq aýyr ahýalǵa jurtshylyqtyń nazaryn aýdartý úshin barǵanyn jelidegi Instagram paraqshasyna jazyp, graffıtı salynǵan úıdiń sýretin júktegen.
Graffıtı avtory belgili bolǵannan keıin Temirtaý qalasynyń ákimi Ǵalym Áshimov sýretshige qatysty eshqandaı jaýapkershilik sharasynyń qoldanylmaıtynyn málimdedi. Muny oblystyq ishki ister departamenti de qýattady.
Al tún jamylyp sýret salǵan Pavel Kas 13-15 mamyrda Shymkent qalasynda ótetin Shymkent Art Days 2016 zamanaýı óner festıvaline shaqyrtý aldy.
Qaırat Ábildınov.
Derek, foto: egemen.kz.