Taıaýda Astanadaǵy «Ulttyq neırohırýrgııa ortalyǵy» AQ Halyqaralyq birikken komıssııasynyń (Joint Commission International, JCI) úsh jyldyq re-akkredıtteýinen sátti ótip, usynylatyn medısınalyq qyzmetter men servıster sapasynyń jáne qaýipsizdiginiń joǵary deńgeıin dáleldedi.
Ústimizdegi jyldyń 29 naýryzy men 1 sáýiri kúnderi ótken jan-jaqty tekserý jumystaryn táýelsiz halyqaralyq komıssııa júrgizdi. Atap aıtsaq, AQSh-tan aýdıtor dáriger, Garvard ýnıversıtetiniń ǵylym magıstri Patrısııa O-Sheı, meıirger, ǵylym magıstri En Ýotkıns, nıderlandtyq ákimshi, emdelýshiniń qaýipsizdigi boıynsha fılosofııa doktory Ozlem Iyldyrym kelgen bolatyn. Akkredıtteý barysynda klınıkadaǵy barlyq dárigerlerdiń, orta jáne kishi medısınalyq personaldyń, ákimshilik bloktyń, ınjenerlik jáne medısınalyq emes qyzmetterdiń jumystary jiti qaralyp, tekserýden ótti.
2013 jyly «Ulttyq neırohırýrgııa ortalyǵy» AQ atalǵan akkredıtteýden tuńǵysh ret ótken edi. Alaıda, JCI standarttary boıynsha halyqaralyq akkredıtasııa týraly sertıfıkattyń is-áreket etý merzimi úsh jyldy quraıdy. Osy merzim aıaqtalǵan soń medısınalyq qyzmetter sapasynyń sáıkestiligin rastaý úshin emdik mekeme re-akkredıtteýden ótip turýy qajet. Budan basqa, akkredıtasııalar aralyǵynda JCI sarapshylary akkredıttelgen uıymdardyń qyzmetine qadaǵalaý tekseristerin júrgizip otyrady. Bul medısınalyq qyzmet kórsetýdiń ártúrli kezeńinde usynylatyn qyzmetter sapasy men qaýipsizdigine kepildik bola alady.
Álem boıynsha JCI standarttaryna 600-deı aýrýhana tolyq sáıkes keledi. Al Qazaqstanda JCI standarttary boıynsha 7 medısınalyq uıym, Reseıde – 2, Lıtvada – 3, Moldovada 1 emdeý mekemesi akkredıttelip úlgerdi.
JCI halyqaralyq akkredıtteýinen ótý – Ulttyq neırohırýrgııa ortalyǵynyń emdeý jáne sapa standarttarynyń joǵary qaýipsizdigine beıimdelýin arttyrady. Bul degenińiz qazaqstandyqtardyń el shekarasynan aspaı, joǵary sapaly medısınalyq qyzmetterdi der kezinde alýlaryna mol múmkindik týdyrmaq.
Raýshan TÁÝIRHANQYZY,
«Egemen Qazaqstan»