Aı sońyndaǵy aıshyqty sátterdiń biri osy boldy desek, artyq aıtqandyq bolmas, sirá. Eýrazııa ulttyq ýnıversıtetindegi «Káýsar» birlestiginiń uıymdastyrýymen belgili aqyn, Qazaqstannyń eńbek sińirgen qaıratkeri, Aıtys aqyndary men jyrshy-termeshilerdiń halyqaralyq odaǵynyń tóraǵasy Júrsin Ermannyń 65 jasqa tolýyna oraı aqynmen kezdesý keshi bolyp ótti.
Birinshi bólimde ýnıversıtettiń fılologııa fakýltetiniń stýdentteri aqynnyń óleńderin oqyp, atalmysh oqý ordasynyń III kýrs stýdenti Nurqanat Qaırat pen Qazaq ulttyq óner ýnıversıtetiniń I kýrs stýdenti Raı Dóńbaıdyń ekeýara aıtysy tyńdaýshylardyń qanyn qyzdyryp, sahnanyń sánin kirgizdi. Odan ári kezdesý keshi suraq-jaýap arqyly óz jalǵasyn tapty. Túrli suraqtarǵa tushymdy jaýaptar berilip, aqynnyń óleńderi tyńdaldy.
«Aıtys uıymdastyryp, sonyń basy-qasynda júrgen soń, meniń kóbinese jazba óleńderim tasada qalyp qoıady. Al búgingi kezdesý meniń sol qyrymdy asha tústi dep oılaımyn», – dedi Júrsin Erman basqosý barysynda.
Shynynda da aqyndy aıtystyń kóshin alǵa súıregen qara nar dep qazaq jurtshylyǵy qabyldap alǵaly qashan. «Aıtys dese Júrsin, Júrsin dese aıtys eske túsedi», dep eldiń bári jarysa jazyp jatatyny da jattandy jaǵdaı bolyp qaldy bul kúnde. Isi qazaqtyń ıgiligine jarasyn dep, atamura ónerimizdiń atasyna aınalǵan aqynnyń bul jolda atqarǵan eńbegi el tarıhynda úlken áriptermen jazylary sózsiz.
Kezdesýdiń sońy án men kúıge ulasyp, Erlan Rysqalı men Shaharızat Seıdahmet án shyrqap, Seken Turysbek pen Aıbek Bekbosyn kúı shertti. Tartymdy ótken kezdesýdi ýnıversıtet rektory Erlan Sydyqov qorytyndylap, Júrsin Ermandy «Kúltegin» medalimen marapattady.
Raýan QAIDAR,
«Egemen Qazaqstan»