Máskeýde Dúnıejúzi qazaqtary qaýymdastyǵy Tóraǵasynyń birinshi orynbasary Talǵat Mamashev Qazaqstannyń Reseıdegi Tótenshe jáne ókiletti elshisi Marat Tájınmen kezdesti. Onda Reseı qazaqtarynyń jáne olardyń ulttyq mádenı ortalyqtarynyń qazirgi jaı-kúıi men bolashaǵy talqylandy.
Kezdesýge Reseı qazaqtarynyń federaldyq ulttyq mádenı avtonomııasynyń prezıdenti Toqtarbaı Dúısenbaev pen Máskeý qazaqtarynyń «Murager» uıymynyń jetekshisi Ernazar Nurıev qatysty.
Resmı derekter boıynsha qazir Reseıde turyp jatqan qazaqtardyń sany 1 mıllıonǵa jýyqtaıdy. Olar negizinen Qazaqstan shekarasyna taıaý Altaı, Novosibir, Omby, Chelıabi, Qorǵan, Orynbor, Saratov, Volgograd, Astrahan oblystarynda ornalasqan. Al eýropalyq bóligindegi qazaqtar negizinen qalalarda turady jáne olardyń sany aıtarlyqtaı kóp emes.
Reseıdegi 30-dan astam ulttyq-mádenı avtonomııalar arasynda 18-shi bolyp qurylǵan Reseı qazaqtarynyń federaldyq ulttyq mádenı avtonomııasyna kelesi jyly 10 jyl tolǵaly otyr. Osyǵan oraı mamyr aıynyń alǵashqy jartysynda M.Tájın T.Dúısenbaevty arnaıy qabyldap, Reseı qazaqtarynyń Qazaqstanmen mádenı jáne ekonomıkalyq qarym-qatynasyn jandandyrý jaıy birlesip talqylanatyn bolady.
Erlik ERJANULY
MÁSKEÝ