QOSTANAI. 28 sáýir. Qostanaı qalalyq meshitinde Ádıba Fahrýtdınqyzy qarııaǵa qurmet kórsetildi. Shara onyń 95 jasqa tolý mereıtoıyna baılanysty ótti. Oǵan jalpy jamaǵat, zııaly qaýym ókilderi, jastar jınaldy. Bul týraly egemen.kz tilshisi habarlady.
Ádıba ájeıdi Qostanaıda tanymaıtyn kisi az bolar bálkim. Ol eń aldymen kóp jyldar boıy jas urpaqty bilimmen sýsyndatqan ustaz bolatyn. Zeınetkerlikke shyqqannan keıin de ustazdyq qyzmetinen alys ketken joq. Ol Táýelsizdik alǵan jyldardan bastap óziniń eńbegin jurtshylyqqa dinı bilim berýge, ıslam qundylyqtaryn ýaǵyzdaýǵa, jastardy ımandylyqqa tárbıeleýge arnady. Qostanaı oblystyq Maral ıshan atyndaǵy ortalyq meshitte jastarǵa jáne nıet bildirgen barsha musylman qaýymyna arab harpin, quran súrelerin úıretti. Qajylyq paryzyn óteımin degenderdi qasıetti saparda qandaı paryzdardy atqarý kerektigin, qandaı súreler men aıattardy aıtý kerektigine deıin daıyndaıtyn. Táýelsizdiktiń eleń-alańynda Qostanaıda kınoteatr, fılarmonııa taǵy basqa da qajettilikterge aınalyp kelgen meshitttiń jamaǵatqa qaıtarylýyna aqsaqaldarmen birdeı júrip, atsalysqan Ádıba áje edi.
Ol: «Maǵan osy jasqa kelgenshe jurtyma ımandylyq sabaqtaryn, dinı bilim berý úshin densaýlyq bergen Alla-taǵalaǵa rahmet, osyndaı qyzmet kórsetýime qoldaý bildirgen, meshittiń hatıb-ımamdaryna rahmet», – dedi.
Tereń dinı bilimdi ákesi Fahrýtdın men anasy Qafııadan alsa kerek. Ol kisiniń naǵashy jurty da dinı adamdar bolady, atasy ıshan eken. Ákesi molda Fahrýtdın 1931 jyly saıası qýǵyn-súrgin kezinde qamalyp, 1933 jyly túrmede qaıtys bolǵan. Ádıba ájeniń anasy da sol 1933 jyly dinı saýattylyǵy men ıshannyń qyzy, moldanyń áıeli bolǵany úshin jazyqsyz túrmede otyrady. Anasy da tek 1991 jyly aqtalady.
Oblystyq Maral ıshan meshitiniń ımamy Baqytbek Nurǵabyluly men meshit qyzmetkeri Jaqsylyq Aısın qazaqy dástúrmen Ábıba ájeniń ıyǵyna kamzol jaýyp, syı-sııapat kórsetti. Belgili kompozıtor Qalıbek Derbisaldın men ónerpaz Túlkibek Rysmaǵanbetovter keshti ánmen órnektep otyrdy. Keshte Ádıba ájeni quttyqtap sóıleýshiler, onyń bıik adamgershiligin, dinı saýattylyǵyn jastarǵa úlgi etkender qatary kóp boldy.
Názıra Járimbetova.
Derek, foto: egemen.kz.