Keshe Parlament Senatynyń Tóraǵasy Qasym-Jomart Toqaevtyń tóraǵalyq etýimen palatanyń kezekti jalpy otyrysy boldy.
Otyrysta birinshi kezekte Qazaqstan Respýblıkasy Prezıdentiniń Jarlyǵymen Bas prokýror bolyp taǵaıyndalǵan Jaqyp Asanovtyń kandıdatýrasyna palata depýtattary kelisimin berdi. Onyń ómirbaıany tanystyrylǵan soń Qazaqstan Respýblıkasy Prezıdentiniń usynýyn qaraý nátıjesi boıynsha Konstıtýsııalyq zańnama, sot júıesi jáne quqyq qorǵaý organdary komıteti Qazaqstan Respýblıkasy Parlamenti Senaty Reglamentiniń 71-tarmaǵyn basshylyqqa ala otyryp, mynadaı qorytyndyǵa keldi:
Qazaqstan Respýblıkasy Parlamentiniń Senatyna Qazaqstan Respýblıkasy Konstıtýsııasy 55-babynyń 2) tarmaqshasyna, «Prokýratýra týraly» Qazaqstan Respýblıkasynyń Zańy 10-baby 1-tarmaǵynyń 1-tarmaqshasyna sáıkes jáne Qazaqstan Respýblıkasy Prezıdentiniń usynýy negizinde Qazaqstan Respýblıkasy Prezıdentiniń Jaqyp Qajmanuly Asanovty Qazaqstan Respýblıkasynyń Bas prokýrory qyzmetine taǵaıyndaýyna kelisim berýge usynys jasalsyn, delingen Senat komıtetiniń qorytyndysynda.
Sonymen qatar, jalpy otyrysta senatorlar Qazaqstan men Makedonııa arasyndaǵy ınvestısııalardy kótermeleý jáne ózara qorǵaý týraly úkimetaralyq kelisimdi ratıfıkasııalady. Makedonııa Prezıdentiniń Qazaqstanǵa memlekettik sapary barysynda 2012 jylǵy 2 shildede Astanada qol qoıylǵan kelisim elderdiń ınvestısııalyq ahýalyn jaqsartýǵa jáne eki eldiń ózara tıimdi saýda-ekonomıkalyq yntymaqtastyǵyn odan ári damytýǵa jaǵdaı jasaıdy. Kelisimde taraptar arasyndaǵy daýlardy sheshý maqsatynda uıymdastyrylǵan Halyqaralyq tórelik sotty qalyptastyrý rásimderin jan-jaqty retteıtin erejeler bar.
Otyrys sońynda О́skemendegi qalalyq balalar aýrýhanasynyń qurylysyn qarjylandyrý týraly senator Sergeı Plotnıkovtyń depýtattyq saýaly jarııa etildi.
Jaqsybaı SAMRAT,
«Egemen Qazaqstan»