Qazaqstan halqy Assambleıasynyń HHIV sessııasynda Elbasy Nursultan Nazarbaev keıingi ýaqytta keıbir ortada qyzý talqylanyp júrgen jerge qatysty másele turǵysynda óz oıyn ornyqty túrde bildirip, kesimdi sózin de aıtty.
Qazaq halqy úshin jerge qatysty áńgimeniń bári de ulttyń namysyna baryp tireledi. Keshegi ótken zamandarda jer úshin keskilesken nebir shaıqastar men qyrǵyndy bastan keshken halyqtyń búgingi urpaǵy máseleni osylaı qoıǵanda ǵana babalar amanatyna adaldyq tanyta alady.
Elbasy osynaý alqaly jıynda ne dedi? Tolǵaqty taqyrypty Elbasy bylaısha tereńinen qozǵady: «Jer – ata-babamyzdan muraǵa qalǵan bizdiń basty baılyǵymyz. Qazaqstannyń 14 myń shaqyrymnan astam memlekettik shekarasyn resimdeý úshin men kórshi elderdiń basshylarymen 8 jyl boıy kelissóz júrgizdim. Osynyń bári jerimizdiń tutastyǵyn qamtamasyz etý úshin jasaldy. Men azamattarymyzdyń osy máseleni kótergenine qýanyshtymyn. Eger jerge dál osylaı kóńil bólinetin bolsa, bul bizdiń halqymyz óz jerin qasyq qany qalǵansha qorǵaıtynyn kórsetedi».
Álbette, bul máseleniń Elbasyn da beıjaı qaldyrmaǵany ǵoı. Eldiń bul máselege qatty alańdaýly ekenin Prezıdentimiz de estip, bilip otyr. Bir ókinishtisi sol, osy jerdi jalǵa berýge qatysty el ishinde túsindirý jumystarynyń jetkilikti túrde júrgizilmegeni osyndaı alypqashty áńgimelerge, baılamsyz baıbalamdarǵa negiz berdi. Muny dereý túzeý kerek!
Nursultan Nazarbaev joǵarydaǵy alypqashpa áńgimeni «Qazaqstannyń jerin sheteldikterge satý týraly jalǵan aqparat» dep aıyptady. «Munyń shyndyqqa janaspaıtyny birneshe ret túsindirildi. Taǵy da aıtqym keledi – aýyl sharýashylyǵy jerlerin shetel azamattaryna jáne kompanııalaryna satý týraly másele joq, talqylanbaıdy da. Bul taqyryptyń tóńiregindegi áńgimeniń bári negizsiz. Bizdiń maqsat – aýyl sharýashylyǵymen aınalysatyndarǵa jeke men-shigine jer alý múmkindigin berý. Eger olar jerge ıelik etetin bolsa, ony kútip-baptap, qadirleıtin bolady. Jer – ata-babamyzdan muraǵa qalǵan bizdiń basty baılyǵymyz», – degen kesimdi sózin aıtty.
Meniń oıymsha, Elbasynyń osy sózderinen keıin el ishindegi baıbalamshylardyń aýzyna qum quıylyp, aıqaıǵa attan qosqan aǵaıyndar sabasyna túsýi kerek.
Qudaıǵa shúkir, qazaǵymnyń ushqan qustyń qanaty talatyn ulan-ǵaıyr jeri bar. Bul jer bizge naızanyń ushymen, bilektiń kúshimen qorǵap qalǵan batyr babalarymyzdan mırasqa qalǵan. Endigi kezekte, biz bul amanatqa qalaı qarap júrmiz, qanshalyqty adaldyq tanytyp kelemiz? Búgingi urpaq darqan dalamyzdyń, qunarly topyraqtyń qyzyǵyn qalaı kórýi kerek dep oılaımyz. «Jerim, jerim», dep jatyp alyp sarnaı bergennen sary dala jemis bermeıdi. Qazirgi tańda, Elbasy aıtqandaı, «qunarly topyraǵy qum bolmasyn» deseńiz, Jer-Anaǵa degen kózqarasty ózgertý kerek. Qazaqtyń jeri tek qana jaıylym emes. Kúte bilse, uqyppen uqsatsa – qara jerdiń qazaqqa berer yrzyǵy mol. Keń dalamyzda egin jaıqalyp, baý-baqsha jaınap tursa ǵoı deıtin kim bar, qane?!
Búgingideı shıkizat kózderiniń narqy tómendep, óndiris tyǵyryqqa tirelgen zamanda jerdi aýyl sharýashylyǵynyń maqsatyna jónimen paıdalana bilgennen utpasaq, utylmaımyz. Osy turǵydan alǵanda, jerdi jan-tánimen súıetin, terin tógip tárbıeleıtin, ıgiligin ózi ǵana emes, ózgege de kórsete alýǵa shamasy jetetin Jer Iesi bolýy kerek! Elbasynyń sessııadaǵy salıqaly sózinen óz basym osyny uqtym.
Jarylqasyn BIKENOV,
Qazaqstannyń eńbek sińirgen qaıratkeri, «Qurmet» ordeniniń ıegeri
QARAǴANDY