Márt Marat

kópbalaly anaǵa páter syılady Elge etene degende, esimizge eń áýeli belgili kásipker, qaıyrymdy azamat, «Aqshyń» korporasııasynyń prezıdenti, Shyǵys Qazaqstan oblystyq máslıhatynyń depýtaty Marat Qurmanbaıdyń esimi oralady. «Aryq atqa qamshy, jyrtyq úıge tamshy aýyr» deıtin qazirgi naryqtyq qyspaq zamanynda zady, aldy keń, júregi jomart jandar kóńilge nur quıatyny bar. Jýyrda Marat Serikjanulynyń tamam jurtty súısindirgen bir kómegi boldy. «Kásip túbi – násip» degen sóz bar qazaqta. Ulttyń násibi ǵoı. О́zińe ǵana emes, ózgege de bolsyn degen tilek pen nıet qabyssa, ultty ushpaqqa shyǵarmaı ma?! Marat Serikjanuly jetekshilik etetin kásiporyn Semeıdiń ortasynan 128 páterli «Aqshyń» turǵyn úı keshenin salǵan bolatyn. Kásipker osy záýlim ári zamanaýı úıden Meıramgúl Abdýalıeva esimdi semeılik kópbalaly anaǵa eki bólmeli páter syılady. Sol sátte páterge qol jetkizgen, alty balany jalǵyz ózi asyrap, tárbıelep otyrǵan ananyń qýanyshyn kórseńiz! Bul barshaǵa jylylyq syılaǵan jaqsylyq edi. Kópbalaly ana osyǵan deıin oblys ákimi, «Nur Otan» partııasy oblystyq fılıalynyń tóraǵasy Danıal Ahmetovtiń qoǵamdyq qabyldaýynda bolǵan edi. Ananyń ahýaly alańdatqan azamattar qarap qalǵan joq. Kómektiń kókesin jasady. «Aǵash kórki – jemis, adam kórki – jaqsy is» deıdi Altyn Orda zamanynyń dańqty shaıyry Saıf Saraıı. Ámse, jan jadyratatyn jaqsy ister arta berse deımiz ǵoı. Marat Qurmanbaı ózi týyp-ósken Abyraly óńirindegi soǵys jáne eńbek ardagerlerine jyl saıyn dástúrli túrde kómek kórsetýdi jolǵa qoıǵan. Bıyl da Jeńis kúni qarsańynda abyralylyq 75 ardagerge syı-syıapat kórsetkenin aıta ketelik. Mamandyǵy boıynsha bilikti ekonomıst, zańger Mákeń eldiń keleshegi – jastarǵa úlken demeý kórsetip keledi. Áleýmettik turǵydan az qamtylǵan otbasylardyń balalaryn aqyly negizde oqytýǵa qoldaý kórsetip júr. M.Áýezov atyndaǵy Semeı pedagogıkalyq kolledji, Shákárim atyndaǵy Semeı memlekettik ýnıversıteti syndy orta jáne joǵary oqý oryndarynda bilim alyp júrgen jastardyń aldynan dańǵyl jol ashylǵanyn kórip, súısinbeske áddiń joq. О́zi quryltaıshysy bolyp otyrǵan «Abyraly-Degeleń» qoǵamdyq qory arqyly taǵaıyndaǵan shákirtaqy negizinde eki birdeı jas «Qaınar» ýnıversıtetin támamdady. Búginde olar ómirden óz ornyn taýyp, elge qyzmet etýde. Kásipker osylaısha 6 balanyń bilim alýyna jaǵdaı jasady. Ol sonymen birge «Meıirim» aksııa­syna belsene qatysýshylardyń biri. Bul aksııa negizinde balalar úıinde tárbıelenip jatqan búldirshinder men jasóspirimderdiń jeke esepshottaryna «aqshyńdyqtar» bir kúndik eńbekaqylaryn aýdaryp otyrady. Osy qaıyrymdylyq sharasy arqyly atalǵan balalardyń kámelet jasqa tolǵandarynda úı satyp alýyna qarajat jınaýyna qoldaý kórsetip otyr. Korporasııa prezıdentiniń qoǵamdyq qyzmetke qosqan úlesi eleýsiz emes. 2013 jyly «Jyldyń úzdik adamy» tanyldy. «Er – týǵan jerine». Marat Serikjanuly «Týǵan jerge – taǵzym» sharasy aıasynda týyp-ósken aýylyn kórkeıtýge, atameken tarıhyn jańǵyrtýǵa qomaqty úles qosyp júr. Atymtaı azamat týǵan Abyraly óńiri – Semeı ıadrolyq synaǵynyń kindiginde ornalasqan, atom apatynan aıtarlyqtaı zardap shekken jer. Dese de, Marattaı márt uldary bar eldiń kóńili júdegen emes. Kásipker Abyraly óńiriniń Qaınar aýylyna mádenı dem­alys saıabaǵyn salyp berip, Semeı ıadrolyq synaq alańynyń jabylǵanyna 20 jyl tolýyna arnalǵan eskertkish pen Uly Jeńistiń 65 jyldyǵyna oraı Abyralydan qan maıdanǵa attanǵan 1500 jaýyngerdiń esimderi jazylǵan memorıal ornatty jáne Táýelsizdiktiń 20 jyldyǵy men Abyraly kóterilisiniń 80 jyldyǵyna oraı «Babalar erligi – Táýelsizdik tiregi» atty taqtatas qoıdy. Sondaı-aq, Abyraly topyraǵynda týǵan qazaqtyń kórnekti tulǵalary, ánshi Ámire Qashaýbaev, jazýshy Saparǵalı Begalın, aqyn Tóleýjan Ysmaıylov jáne Qazaqstannyń tuńǵysh qarjy mınıstri Rymbek Baıseıitovke keýdemúsinder qoısa, aldaǵy ýaqytta kórnekti ǵalym Rymǵalı Nurǵalıevke eskertkish qoıýdy josparlap otyr. «Abyraly-Degeleń» qoǵamdyq qory arqyly jasalǵan jumystardyń taǵy bir parasy retinde qaıtarymsyz granttarmen Aqbulaq jáne Abyraly aýyldyq okrýgterinde eki balabaqshanyń ashylǵanyn aıtýǵa bolady. Bul aýyldar – Semeı ıadrolyq polıgonynan eń qatty zardap shekken eldi mekender. Marat Serikjanuly oblystyq máslıhat depýtattyǵyna saılanǵan №20 saılaý okrýgi Abyraly óńiri men Jańa Semeıdi qamtyǵan, quramyna 16 aýyldyq okrýg, 24 eldi meken enetin eń iri okrýgterdiń biri. Shúlbi kentinen Alǵabas, Doǵalań aýylyna jáne bir qabyrǵasy Kýrchatov qalasyna deıingi aýmaqty alyp jatqan okrýg saılaýshylarynyń senimin arqalaǵan halyq qalaýlysy máslıhat minberinen kóptegen áleýmettik máselelerdiń oń sheshimin tabýyna úles qosty. Qazirgi kezde jerlesteriniń amanaty retinde Semeı synaq polıgonynan zardap shekken aǵaıynǵa áleýmettik jeńildikter qarastyrý qamynda júr. Dýman ANASh, «Egemen Qazaqstan» SEMEI