Aldyńǵy kúni ushaqtan túsken bette «Aqtóbe-aqparat» ortalyǵynda oblystaǵy buqaralyq aqparat quraldary ókilderimen kezdesý ótkizip, áriptesterimen oı bólisken Parlament Májilisiniń depýtaty Saýytbek Abdrahmanov keshe, jumys saparynyń ekinshi kúninde Hromtaý aýdanynda bolyp, sondaǵy Dóń taý-ken kombınatynyń sport kesheniniń, taý-ken kolledjiniń, «Hromtaý kirpish zaýyty» JShS-nyń jumysymen tanysty.
Májilis depýtaty kenshiler Mádenıet úıinde qala turǵyndarymen, kásiporyndar men qoǵamdyq uıymdar ókilderimen kezdesti. Oblys ákimi Berdibek Saparbaev óz sózinde óńirdegi ekonomıkalyq-áleýmettik jaǵdaı turaqty ekenin, áleýmettik mindettemelerdiń oryndalǵanyn atap ótti. Azyq -túlik baǵalaryn arzandatý baǵytynda birqatar jumys júrgizilip jatqanyn tilge tıek etti.
S.Abdrahmanov «Máńgilik El» Patrıottyq aktisiniń mán-mańyzyn túsindirip, nasıhattaý Aqtóbe jerine kelgen depýtattardyń negizgi maqsaty ekenin aıta kelip, bul ıdeıanyń ózegi Táýelsizdik pen Jalpyǵa Ortaq Eńbek Qoǵamy ekenin baıan etti. «Máńgilik El» Patrıottyq aktisi osy jyly sáýir aıynda ótken Qazaqstan halqy Assambleıasynyń HHIV sessııasynda qabyldanǵanyn, qujatta Máńgilik Eldiń jeti ustyny – Táýelsizdik jáne Astana, Jalpyulttyq birlik, Beıbitshilik jáne kelisim, Zaıyrly memleket jáne Joǵary rýhanııat, Innovasııa negizindegi turaqty Ekonomıkalyq ósim, Jalpyǵa Ortaq Eńbek Qoǵamy, Tarıh, mádenıet jáne til tutastyǵy, Ulttyq qaýipsizdik pen jalpy álemdik jáne óńirlik máselelerdi sheshýge Qazaqstannyń atsalysýy negizdelgenin tarqata áńgimeledi.
B.Saparbaev pen S.Abdrahmanov keshe tústen keıin Tahaýı Ahtanov atyndaǵy oblystyq qazaq drama teatrynda qala jurtshylyǵy, úkimettik emes uıymdar, shaǵyn jáne orta bıznes, etnomádenı birlestikter ókilderimen júzdesti. Depýtat «Máńgilik El» Patrıottyq aktisiniń mán-maǵynasy týraly tarata baıandady, sonymen qatar, jer máselesi taqyrybyndaǵy áńgime tóńireginde oryn alǵan túsinbeýshiliktiń belgili bir dárejede atqarýshy bılik tarapynan túsindirý jumystarynyń kemshin bolǵandyǵynyń saldary dep sanaıtynyn da ashyq aıtty.
Kezdesýde jumys oryndaryn ashý, maman kadrlar daıarlaý, oralmandar, turǵyn úı salýǵa jer bólý jáne basqa máseleler áńgime ózegine aınaldy. «Máńgilik El» ulttyq ıdeıasyn túsindirý maqsatynda Aqtóbe jerine kelgen Parlament Májilisiniń depýtattary Sergeı Sımonov, Danııa Espaeva, Muhtar Erman, Asylbek Smaǵulov, Quralaı Qaraken Mártók, Muǵaljar, Temir, Shalqar jáne Qobda aýdandarynda bolyp, saılaýshylarmen kezdesti.
Satybaldy SÁÝIRBAI,
«Egemen Qazaqstan»
Aqtóbe oblysy