ASTANA. 7 mamyr. Kanadanyń Alberta provınsııasynda orman órti órship tur. Bul týraly 24.kz-ke silteme jasaǵan egemen.kz tilshisi habarlady.
Qyzyl jalynnyń saldarynan elde munaı baǵasy qymbattady. Sebebi, ken oryndarynyń negizgi bóligi dál osy aımaqta ornalasqan. Osyǵan baılanysty, birneshe kompanııa shıkizat óndirý kólemin azaıtty.
Alapat órt Kanadanyń batysyndaǵy Fort-Makmıýrreı qalasyndaǵy áýejaıǵa da ulasty. Sonymen qatar, aeroport qasyndaǵy qonaqúı men dúkender qyzyl jalynǵa orandy. Jolaýshylar qaýipsiz aımaqqa kóshirilip, áýe reısteriniń bári keıinge shegerildi.
Qazir tilsiz jaýdyń kólemi 10 esege artqan. Sondaı-aq, aımaqta turatyn 90 myńǵa jýyq turǵyn baspanalaryn tastap ketýge májbúr boldy. Qazir olar jergilikti hokkeı arenalary men sport zaldaryn panalaýda. Zardap shekkenderge Toronto qalasyndaǵy eriktiler gýmanıtarlyq kómek kórsetip jatyr.
Resmı málimetter boıynsha, alapat órt 85 myń gektar aýmaqty sharpyp úlgergen. Saldarynan 1,5 myńnan astam ǵımarat jaramsyz bolyp qaldy. Boljam boıynsha shyǵyn kólemi 8 mıllıard dollardy qurap otyr.
Aıan Ábdýálı.
Derek, foto: 24.kz.