Shardara aýdany Jaýshyqum aýylyndaǵy «Turar» sharýa qojalyǵynyń basshysy Iýrıı Annyń iske kiriserde qolyna kúrek pen kalkýlıatordy qatar alǵany baıqalyp tur. Sharýa qojalyǵy ınnovasııalyq ádis boıynsha pııaz egýde. Bul ispen sońǵy bes jyldan beri aınalysyp kele jatqan sharýashylyq bıylǵy jyly 30 gektar alqapqa «Ranko» dep atalatyn jańa tuqym sortyn egip jatyr. Dıqandar jýanyń ónimi bitik bolaryna senimdi. Bul oraıda olar ınnovasııalyq ádisti zamanaýı tehnıkamen júzege asyrýda. О́ńdelip, tolyq daıyndalǵan alqapqa tuqym seýip bara jatqan álgi zamanaýı tehnıkańyz bir mezette birneshe jumysty atqaryp shyǵady. Talapqa saı qashyqtyqta, ıaǵnı bir-biriniń arasyn 3 santımetrden etip tuqym tastaýmen qatar, tamshylatyp sýaratyn sý tútigin qosa kómedi. Shyǵysy men kirisin esepshotqa salǵan Iýrıı Annyń aıtýynsha, bir gektarǵa 6 kelideı tuqym ketedi eken. Joǵary sortty tuqymnyń bir kelisi 64 myń teńge turady. Jerdi jyrtýdan bastap, jıyn-terim naýqanyna deıingi jalpy shyǵynnyń kólemi ár gektarǵa 1 mln 300 myń teńgeden jumsalady. Degenmen, túsken ónim ketken shyǵyndy eselep jabady eken. Dıqannyń esebinshe, bir gektar alqaptan eń keminde 80 tonna ónim alynady. Pııazdyń baǵasy 45-50 teńgeden tómen túspegenin eskersek, paıdanyń az bolmaıtynyn ańǵaramyz.
О́tken jyly gektaryna 80 tonnadan ónim alǵan sharýa qojalyǵy bıyl bul kórsetkishti 100 tonnaǵa jetkizýdi josparlap otyr. Suryptaýdan ótken jańa tuqym sortyn alǵan sharýashylyqtyń tehnıkasy jetkilikti, jer alqaptary babynda bolǵandyqtan dıqandar jospar oryndalatynyna senimdi. Dıqandar senimin aýdan ákimi Bolatbek Qystaýov nyǵaıta tústi. Sharýashylyqtyń jaı-kúıimen tanysýǵa barǵan aýdan basshysy dıqandar úshin ózekti bolyp turǵan sýlandyrý máselesi boıynsha jumys júrip jatqanyn málimdedi. Bul jumys ońtaıly sheshimin tapqan kezde «Turar» sharýashylyǵyna qarasty 286,5 gektar alqapqa túrli daqyldar otyrǵyzylmaq. Aıta ketelik, Jaýshyqumnyń jýasy ońtústik turǵyndarynyń suranysyna ıe, oblys ortalyǵyndaǵy saýda oryndarynda qys boıy satylýy sózimizge dálel.
Ǵalymjan ELShIBAI, «Egemen Qazaqstan»
