Bul qazynany belgili aqyn ári aýyz ádebıetin zertteýshi ǵalym О́tebaı Turmanjanov jınap, qurastyryp, 1959 jyly Almatydaǵy Qazaqtyń memlekettik ádebıet baspasynan basyp shyǵarǵan.
...Mine, osy kitapty men ózimniń jekemenshigim dep oılaıtynmyn. Sóıtsem, onym beker eken. Tek ánsheıin, uzaq ýaqyt qolymda bolǵan soń kózim úırenip, ózimshe ıemdenip qalyppyn.
Birde aýyldan sheshem qydyryp keldi. Keshke jumystan oralsam, ol kisi álgi sary kitapty alyp, úńilip qarap otyr eken.
– Iá, qalaǵa kelip, maqal-mátel úıreneıin degensiz be? – dep kúldim.
– E-e, – dedi sheshem jeńil ǵana kúrsinip. – Myna kitapty kórip, qaı-qaıdaǵylar esime túsip otyr-daǵy... Ákeń muny baıaǵyda Arystaǵy kitap dúkeninen satyp alyp, maǵan syılap edi. Mine, sondaǵy jazýy... Tup-týra sol kúngideı kóz aldymda tur!
– Káne, kóreıinshi, – dep qolymdy sozdym. Sheshem sary kitaptyń betin alaqanymen aıalaı sıpap, maǵan usyndy.
Rasynda da, muqabanyń ishki jaǵyna: «1959 jyl. 19 avgýst. Arys stansasy. Tursynǵa – Baltaqaradan» dep jazylǵan eken.
Burynyraqta bul jazýdy oqydym ba, oqymadym ba, esimde joq. Oqysam da, sirá, dál qazirgideı mán bere qoımasam kerek.
– Apyr-aı, – dedi sheshem ózimen-ózi sóıleskendeı bolyp. – Sodan beride qanshama jyl ótti... Ol kezde bizdiń jańa ǵana otaý qurǵan kezimiz ǵoı. Sender áli bul dúnıede joq edińder. Endi oılap qarasam, sodan bergi kóship-qonǵan jerlerde úı saldyq, jıhaz aldyq... Bári tozdy. Al mynaý kitap... sol baıaǵy qalpynda tur!..
Nurǵalı ORAZ,
«Egemen Qazaqstan»
