Kórkem aýdarma sabaǵynda negizinen dáristerden góri, stýdenttiń óz betimen jumys isteýine kóńil bólemiz. Alǵashynda shaǵyn mátindermen jumys isteıdi. Kórkem aýdarma qıyn. Oǵan aýdarma satylaryna tóselip baryp, keledi. Keıde óz qalaýymyzben, keıde ózderi shaǵyn áńgimelerdiń aýdarmasyn jasap ákeledi. Mark Tvenniń, Genrıdiń shaǵyn áńgimeleri aýdarmaǵa alǵashqy qadam jasaýǵa óte yńǵaıly. Nátıjesi jaman emes, jalǵyz tárjimalap qoımaı, aýdarmany taldaýmen aınalysady. Sońǵy kezeńde qazaq elinde aýdyrylǵan shyǵarmalardy salystyryp, talqylap júrmiz. Aýdarma qalaı jasaldy, artyqshylyǵy, kemshiligi nede degen suraqtarǵa izdenýshiler jaýap tabýǵa tyrysady. Bunyń ózi aýdarmashynyń kózqarasyn, sózge qarym-qatynasyn qalyptastyratyn prosess. Stýdentterdiń aýdarǵan áńgimeleri «Juldyz» jýrnalynda, «Qazaq ádebıetin» gazetinde jaryq kórdi. Gúlshat Túsipova degen túlegimiz Oskar Ýaıld pen Edgar Ponyń áńgimelerin aýdarǵan, «Aýdarma» baspasynan kitap bolyp shyqty. О́zimiz «Báısheshek» degen stýdentterdiń aýdarma kitabyn shyǵardyq. Oǵan eń jaqsy degen aýdarmalardy engizdik. Bul – stýdentterdi yntalandyrý.
Stýdentterdiń bári birdeı kórkem aýdarmaǵa beıim bola bermeıdi. О́zderi iriktelip shyǵady. Aýdarma jasaǵanda úsh tildi paıdalanamyz. Salystyramyz. Qazir shyǵarmalardy aǵylshyn tiline aýdarý kerek. Orysshaǵa aýdarmaı, birden aǵylshyn tiline. О́ıtkeni ýaqyt talaby solaı.
Aýdarmany redaksııalaý degen sabaq bar. Qazir kóp kitaptar kemshilikpen shyǵyp jatyr. Redaktory joq. Bizdiń baspalarda qalaı ekenin bilmeımin, biraq shetelderde aýdarma redaktory degen qalyptasqan mamandyq bar. Aldymen kitapty shyǵarmaı turyp, aýdarmanyń sapaly, sapasyz ekenin anyqtaıdy. Biz sheteldiń bir jazýshysyn aýdarsaq, aýdardyq dep úlken maqtanyshpen aıtamyz. Biraq tájirbıeli mamandar synasa, talqany shyǵady. О́ıtkeni aýdarma syny, aýdarma talqysy joq. Qazir stýdenterdi oqytqanda osy taldaýǵa, synǵa kóńil bólip otyrmyz.
Buryn oqý quraly az bolatyn, qazir kóbeıip keledi. Alǵashynda bar-joǵy eki-úsh-aq kitap bar edi. Qazir aýdarma teorııasynan on shaqty oqýlyq bar. Álem ádebıeti jáne kórkem aýdarma, aýdarma praktıkasy, ártúrli aýdarmanyń túrlerine baılanysty kitaptar jetkilikti. Jańǵara Dádebaev, Temirǵalı Esembek sııaqty ǵalymdarymyzdyń eńbekteri bar. Biraq áli de kóp oqýlyqtar jazyla berý kerek.
Ánýar TARAQ,
Ál-Farabı atyndaǵy
QazUÝ-dyń professory
