Jazýshylardyń basty jıynynda QR Mádenıet jáne sport mınıstri Arystanbek Muhamedıuly Elbasy Nursultan Nazarbaevtyń quttyqtaýyn oqyp berdi. Jıynda negizgi baıandama jasaǵan Jazýshylar odaǵynyń qazirgi tóraǵasy Nurlan Orazalın qalamgerler odaǵy atqarǵan jumystarǵa kezeń-kezeńimen sholý jasap ótti.
«Qazaqstan jazýshylar odaǵy Keńes odaǵy kezindegideı ıdeologııalyq qural emes. Olaı bolýy da múmkin emes. Biz quqyqtyq qoǵamda ómir súrip jatqan erkin qalamgerlerdiń erkin birlestigimiz. Ondaǵan, júzdegen qoǵamdyq uıymdar sııaqty biz de qoǵamdyq birlestikterdiń biri ǵanamyz. Zańda kórsetilgen talaptarǵa saı jarǵymyzda kórsetilgen baptarǵa baılanysty ómir súrýge mindettimiz. Búginde odaqtyń quramynda 780-nen astam qalamger bar. Ádebıet deıtin kıeli uıymǵa 84 jyl ıe bolǵan Jazýshylar odaǵynyń jumysyn túgel túgendeý múmkin emes, biz sońǵy 5 jylda atqarylǵan jumystardy aıtyp shyqtyq. Uıym odaq negizin qalaǵan Alash arystary zamanynda da, odan keıin Muhtar, Ǵabıtter basshylyq etken kezeńde de joıylyp ketpegen. Jazýshylar odaǵynda ótken 22 jyl men úshin úlken mektep boldy. Barlyǵyńyzǵa alǵysymdy aıtamyn. О́zime bata bergen aǵalarym arýaǵy aldynda basymdy ıemin. Osy minbeden barlyǵyńyzǵa rızashylyǵymdy aıta otyryp, tóraǵalyqqa saılaýǵa túspeıtinimdi jetkizgim keledi. Endi jańadan saılanatyn baýyrlarymyzǵa sáttilik tileımin. Ádebıetimiz máńgi bolsyn!», dedi Nurlan Orazalın.
Nurlan Orazalın baıandamasynda ádebıetke qoldaý bildirgen birqatar oblys ákimderi men Almaty qalasy ákimi Baýyrjan Baıbekke alǵysyn aıtyp, jas jazýshylardyń ádebıet álemine jol ashqan kommersııalyq uıym basshylaryna rızashylyǵyn bildirdi.
