Elimizdiń týyn resmı túrde kóterý saltanatyna Qazaqstan quramasynyń sportshylary men elimizdegi sport salasyn basqarýshy mamandar qatysty.
Qazaqstan Ulttyq Olımpıadalyq komıteti sport Dıreksııasynyń basshysy, Azııa oıyndaryndaǵy Qazaqstannyń sporttyq delegasııasynyń jetekshisi Elsııar Qanaǵatov tý kóterý saltanatyna jınalǵan sportshylarǵa sáttilik tilep, Azııa oıyndarynyń Qazaqstan úshin mańyzdy sport dodasy ekenin atap ótti.
«Búgin Azııa oıyndarynda elimizdiń kók baıraǵy kóterildi. Qazirgi tańda 200-ge jýyq sportshy Djakarta men Palembang qalalaryndaǵy atletıkalyq aýylǵa kelip qonystanýda. Quramadaǵy kóptegen sportshylar jarys kestesine saı Azııa oıyndaryna aldaǵy ýaqytta ushyp keledi. Atletterdi kútip alý, ornalastyrý, tamaqtandyrý máseleleri túgeldeı sheshilgen. Búginde Indonezııadaǵy sportshylarymyz jattyǵý jumystaryn bastap ketti. Al keıbir komandalyq sport túrlerinen irikteý kezeńindegi matchtar ótip jatqanyn bilesizder. Gandbolshylar men basketbolshylarymyz Azııa oıyndaryndaǵy irikteý kezeńderin ótkizýde. Biz sportshylarymyzǵa sáttilik tileımiz! Jankúıerler úmit artyp otyrǵandyqtan, halyqty qýantady dep senemiz», - deıdi Elsııar Qanaǵatov.
«Mine, elimizdiń kók baıraǵy atletıkalyq aýylda jelbiredi. Bul bizdiń jarys ornyna kelip, qatysýǵa daıyn ekenimizdi rastaıdy. Sportshylardyń kóńil-kúıi kóterińki! Keshe Elsııar Baımuhamedulynyń bastamasymen shtab otyrysyn ótkizdik. Azııa oıyndarynda sportshylarǵa kórsetilgen jaǵdaıdy tolyǵymen jaqsy dep aıtýǵa bolady. Árıne, azdaǵan kemshilikter kezdesedi. Dese de, jalpy alǵanda bári de kóńilden shyǵady. Tamaqtaný da tolyǵymen rettelgen. Azııa oıyndaryna Qazaqstan quramasy qarqyndy jattyǵý jumystaryn júrgizdi. Qazaqstan Ulttyq Olımpıadalyq komıteti men Mádenıet jáne sport mınıstrligi sportshylardyń alańsyz daıyndalýyna tolyqtaı múmkindik jasady. Qazaqstan UOK prezıdenti Tımýr Asqaruly Qulybaev qurama komandanyń daıyndyǵyn óz baqylaýyna alyp, barlyǵyn qadaǵalap otyrdy. Sondyqtan, sportshylarymyz senimdi aqtap, jeńiske jetedi degen úmit mol», - deıdi sporttyq jekpe-jek jáne kúsh qoldanylatyn sport túrleri Konfederasııasynyń atqarýshy dırektory Eldos Ramazanov.
Sportshylar atynan sóz alǵan sporttyq gımnastıka sheberi Mılad Karımı Azııa oıyndarynda júlde alý úshin bar kúshin salatynyn jetkizdi.
"Azııa oıyndaryna alǵash ret qatysyp otyrmyn. Mundaǵy komandalyq rýhty sózben jetkizý múmkin emes. Osyndaı keremet sátti Ýnıversıada kezinde bastan ótkergen edim. Komandalastarymmen birge elimizdi qýantyp, júlde alýdy maqsat etýdeıiz. Jankúıerler senimin aqtaımyz", - deıdi Karımı.
Eske sala keteıik, Jazǵy Azııa oıyndary 18 tamyz -2 qyrkúıek aralyǵynda Djakarta men Palembang qalalarynda ótedi. Qazirgi tańda Djakartadaǵy atletter qalashyǵyna olımpıadalyq sport túrleri boıynsha 15 komanda, Palembangta 4 komanda qonystandy.
