Jańa tehnologııalar zamanynda elektrondy túrde aqparat almasý bilim kókjıegin odan ári keńeıte túsýge yqpal etedi. Taıaýda ashylǵan qalalyq aqparattyq kitaphanalar júıesiniń jańa kovorkıng ortalyǵy halyqtyń bilimge qushtarlyǵyn arttyrýǵa septigin tıgizetini daýsyz. Jańa nysan oqyrmandarǵa qolaıly qyzmet kórsetý úshin qajetti gadjet quraldarmen jabdyqtalǵan. Innovasııalyq oryndyqtar kez kelgen telefonǵa qosylyp, qajetti aqparat alýǵa múmkindik beredi. Osynyń barlyǵy tegin ári jyldam ınternettiń kómegimen jumys isteıdi.
Elektrondy kitap ordasynda izdeý júıesi jasaqtalyp, jańa tolyqtyrýlar engizilgen. Qalaǵan kitabyńyzdy ataýymen, avtorymen, basqa da derekter arqyly ońaı ári jyldam taýyp alýǵa bolady.
Kovorkıng ortalyǵynda sheberlik sabaqtar, leksııa-semınarlar ótkizý josparlanǵan. Qala jurtshylyǵy osy ortalyqqa kelip, ózderin tolǵandyryp júrgen kez kelgen máselelerdi talqylap, jandy pikir almasý alańyn ótkize alady.
Baıqal BAIÁDIL,
«Egemen Qazaqstan»
KО́KShETAÝ
