Osy jolǵy sapardyń ózindik ereksheligi bar, sebebi buǵan Qyrǵyzstan, Reseı jáne Belarýs sııaqty elderden kelgen qazaq dıasporasy ókilderiniń balalary qatysty. 9 kúnniń ishinde balalar 5 iri qalany aralap, ár qalanyń tarıhyn tereńirek tanyp, jan-jaqtan kelgen qurbylarymen tanysqan. Sondaı-aq qalalar arasyndaǵy sapar barysynda túrli úıirmeler men sheberlik-synyptarǵa qatysyp, ýaqyttaryn qyzyqty ótkizdi.
«Men sizderdi ekinshi maýsymnyń jabylý saltanatynda kórgenime qýanyshtymyn. Ári áleýmettik jelidegi ártúrli pikirlerińizden jazǵy lagerdiń joǵary deńgeıde ótkenin, sonymen qatar sizderge unaǵanyn baıqadym. Saıahatqa toly sapar jandaryńyzda jattalyp qalatynyna, ýaqyt óte kele qyzyqqa toly estelikke aınalatynyna senimdimin. «Týǵan elge saıahat» lageri el tarıhyn tanýǵa jasalǵan saparlardyń bastaýy bolyp, keleshek ómirlerińiz jarqyn sáttermen órilsin», dedi «Áleýmettik jobalar qory» korporatıvtik qor dırektory Erbol Ermuhanuly.
Esterińizge sala ketsek, 1 maýsym Halyqaralyq balalardy qorǵaý kúni «Týǵan elge saıahat» balalar týrıstik poıyzy» jobasynyń alǵashqy maýsymy bastalǵan bolatyn. Jobany «Samuryq-Qazyna» AQ kompanııalar toby atynan «Samruk-Kazyna Trust» áleýmettik jobalardy damytý qory júzege asyryp jatyr jáne balalardyń jan-jaqty damýyna, qorshaǵan álemge qyzyǵýshylyǵyn arttyrýǵa, eldiń tarıhı jáne sáýlet eskertkishterimen tanysyp, patrıotızmdi nyǵaıtýǵa baǵyttalǵan. Poıyz baǵdaryna Nur-Sultan, Baıqońyr, Taraz, Almaty jáne Balqash sııaqty qalalar kiredi. Jalpy, 2019 jylǵy maýsym jobasyna 600 bala qatysty.
Atalǵan lagerdiń tynyǵýshysy, Qyzylorda oblysy, Shıeli aýdanynyń oqýshysy Pernebaı Aqnıet aǵynan jarylyp, elimizdiń tarıhı hám tabıǵı eldi mekenderimen etene tanysqanyn jasyrmady.
«Týǵan elge saıahat» lageri bizdi Qazaqstannyń eń mádenı óńirlerimen, atap aıtqanda bas qalamyz, jas qalamyz Nur-Sultanmen, qart qalamyz Almatymen, kóne qala Tarazben, ǵarysh qalasy Baıqońyrmen tanystyrdy. Maǵan eń qatty unaǵan qala Nur-Sultan jáne Taraz. Nur-Sultan qalasynda biz Nazarbaev Ýnıversıtetinde boldyq. Bul ýnıversıtette kóptegen ult ókilderi bir-birimen jarysa izdenip, bilimmen sýsyndaýda. Mende bolashaqta elge qyzmet etetin azamat bolý úshin dál osy Nazarbaev Ýnıversıtetine túskim keledi. Al Taraz qalasynda qudyreti men qasıeti tasyǵan Aısha bıbi, Qarahan jáne Babadja Hatýn kesenelerinde bolyp, ejelgi dáýir mádenıetimen tanystyq. Osyndaı ejelgi dáýir eskertkishterimen qatar, osy zaman mádenıetin bir-birimen úndestirip, toǵystyratyn jobalar kóp bolsa, elimizdiń de tuǵyry bıik, al jas patrıottarymyzdyń shyǵar shyńy aspanmen talasqan taýlardyń eń bıik shyńy bolmaq», dedi ol.
Uıymdastyrýshylardyń aıtýynsha, lager maýsym, shilde, tamyz aılaryn qamtıdy. Oǵan kóp balaly, az qamtylǵan jáne tolyq emes otbasynda tárbıelenip jatqan, óndiristik kásiporyndar men zaýyt jumysshylarynyń oqý úlgerimi jaqsy balalar, «Otandastar qory» KEAQ-men seriktestik negizinde shet memleketterden kelgen qazaq dıasporasynyń ókilderi jáne shyǵarmashylyq baıqaý qorytyndysy boıynsha anyqtalǵan jeńimpaz balalar kiredi.
Raýan QAIDAR,
«Egemen Qazaqstan»
