Bıǵash aýylynda Barmaq batyrdyń qurmetine voleıbol týrnıri ótkizildi. Jońǵar basqynshylaryna qarsy kúreste eren erlik kórsetip, ulan-ǵaıyr qazaq dalasyn jaýdan azat etý jolynda ómirin qurban etken bahadúrdi eske alý maqsatynda bıyl tuńǵysh ret uıymdastyrylǵan týrnır endi jyl saıyn dástúrli túrde ótkizilip turmaq. Aýdan ákimi Ashat Smaılov jarystyń ashylý saltanatynda osylaı dedi.
Ýaq Barmaq batyr qazaq tarıhynda ózindik orny bar tulǵa. Qarakereı Qabanbaı batyrdyń senimdi serigi, qol bastaǵan bahadúr. Qazaq dalasyn basqynshylardan azat etý jolynda ómirin qıǵan ult batyry.
«Batyr beıiti Bıǵash aýylyna qarasty Qyzylbulaq aýmaǵynda, Kókpekti ózeniniń jaǵasynda. Elimizdiń barlyq aýmaǵyn meken etetin urpaqtary jınalyp, batyrdyń basyna qulpytas, aýdan ortalyǵyna keýdemúsin ornatty. 2017 jyly aýdan ortalyǵynda Barmaq Batyrdy eske alýǵa arnalǵan fýtbol týrnıri ótkizildi. Aǵymdaǵy jyly qoǵam belsendileri tarapynan Tolaǵaı aýylyndaǵy negizgi mektep pen aýdan ortalyǵyndaǵy bir kóshege esimin berý jóninde usynystaryn aıtty. Aýdan ákimi Ashat Smaılovtyń tikeleı muryndyq bolýymen ótkizilip otyrǵan voleıbol týrnıri batyr babanyń esimi urpaq jadynda máńgilik jańǵyryp, umytylyp qalmaıtynyn anyq kórsetedi. 1992 jyldan beri qańyrap bos turǵan Bıǵash mektebiniń sport zaly bıyl qaıta jóndeýden ótkizilip, sońǵy 30 jyldaǵy alǵashqy úlken sharanyń Barmaq batyr rýhyna arnalǵany kóp nárseni ańǵartady.
Týrnırdi uıymdastyrý jumystarynyń basynda Sport bóliminiń basshysy Erjan Káribaev, tájirıbeli maman Sábıt Temirhanov, jattyqtyrýshy Altaı Maqsutuly, Bilim bóliminiń mamany Talǵat Qasaınov júrdi. Mektep ujymy da erekshe ázirlenipti. Aýyldaǵy árbir sharanyń aldyńǵy shebinen tabylatyn ardager Qadyr Sembaıuly bul joly da belsendilik tanytty. Saıys qorytyndysynda saqa oıynshy Kárim bastaǵan samarlyq jas voleıbolshylar Barmaq batyr týrnıriniń jeńimpazy atandy. Aqqala quramasy 2 oryndy mise tutty. Kókjaıyq quramasy 3 oryndy oljalady» deıdi aýdandyq «Juldyz» gazetiniń redaktory Darhan Berdibek.
Shyǵys Qazaqstan oblysy,
Kókpekti aýdany
