Qarashyǵanaq munaı-gaz keshenin ıgerýshi QPO bv kompanııasy bıznestiń áleýmettik jaýapkershiligi baǵdarlamasy aıasynda jasaǵan qaıyrymdylyq kómegi koronavırýs indeti órship turǵan qazirgi kezeńde óte paıdaly boldy. "LADA Largus" avtokóligi bazasynda jabdyqtalǵan qos jedel járdem kóligi kereýetpen, qajetti qural-jabdyqtardy qoıatyn qondyrǵylarmen jabdyqtalǵan.
- Bizdiń buǵan deıin paıdalanyp júrgen kólikterimiz "ÝAZ" zaýyty ónimderiniń bazasynda edi. Aýdandyq aýrýhanaǵa qaraıtyn 6 aýyldaǵy jedel járdem kóligi de ábden tozǵan, júrýinen turýy kóp bolatyn. Myna jańa kólikter bizdiń qyzmetimizdiń tez ári sapaly bolýyna kómektesedi. Aýdan ortalyǵyndaǵy ÝAZ avtokólikterin aýyldardaǵy FAP pen medısınalyq pýnktterge bergeli otyrmyz. Qazirgi tańda oblystyq jedel járdem mekemesine qarasty eki brıgada, aýdandyq aýrýhanaǵa qarasty jedel medısınalyq 1 brıgada táýlik boıy jedel kómek jasap otyr. Biraq bul halyqqa jetkiliksiz. Koronavırýstyq ınfeksııanyń órshýine baılanysty halyq arasynda aýrý kóbeıdi. Biz bolashaqta aýdanǵa keletin medısınalyq mamandardan taǵy da jedel medısınalyq kómek beretin brıgada jasaqtaýdy josparlap otyrmyz, – deıdi Bórli aýdandyq aýrýhana dırektorynyń mindetin atqarýshy Shyńǵys Sársenǵalıev.
Jalpy, QPO bv kompanııasy Bórli aýdandyq aýrýhanasynyń materıaldyq-tehnıkalyq bazasyn nyǵaıtýǵa únemi kóńil bólip turady. Aıtalyq, jýyrda olar aýdandyq aýrýhanaǵa medısınalyq jabdyqtardy, ókpeni jasandy jeldetý fýnksııasy bar narkoz apparattaryn, kompressorlarymen birge anestezıologııalyq quraldardy syıǵa bergen edi. Bul ıgi bastama ózge kompanııalar tarapynan da qoldaý tapqan. Máselen, Qazburgaz AQ buǵan deıin 1 jedel járdem kóligin syılaǵan bolatyn. Al keshe "Aqsaı ındýstrıaldy parki" seriktestigi aýdandyq aýrýhana menshigine LADA Vesta bazasyndaǵy jeńil avtokólikti tabys etti.
Batys Qazaqstan
