Tekserý barysynda SNAS ınspektorlary Ulttyq ortalyqtyń uıymdyq qurylymyn jáne Farmakologııalyq synaqtar zerthanasynyń jalpy qurylymda ornalasýyn qarastyrdy. Qyzmetkerlerdiń biliktilik deńgeıine, qoldanylǵan jabdyqtardyń, materıaldar men reagentterdiń sapasy men sáıkestigine, sondaı-aq sapany qamtamasyz etý júıesiniń jáne GLP-zertteýler qujattamasyn júrgizý jumysyna qaıta baǵalaý júrgizildi. Kompıýterlendirilgen júıelerge valıdasııa ótkizilip, barlyq qyzmet túrleri boıynsha qujattama egjeı-tegjeıli ınspeksııalandy. Zerthanany baǵalaý qashyqtyq rejiminde júrgizildi. Osyndaı formatty qazir kóptegen sheteldik akkredıtteý organy (Eýropalyq odaq elderi, Ulybrıtanııa jáne AQSh) qoldanady.
Tekserý qorytyndysy boıynsha SNAS sarapshylary zerthana menedjmenti júıesin joǵary baǵalady, mamandardyń tehnıkalyq quzyrettiligin jáne GLP OECD halyqaralyq standarty talaptarynyń qadaǵalanýyn rastady.
DZSUO bas dırektory Erken Dáýitbaevtyń aıtýynsha, osy aýdıt aıasynda zerthananyń atqarǵan jumysyna jan-jaqty táýelsiz baǵa berildi.
«Oń baǵa alý – zor mártebe. SNAS komıssııasy zerthana jumysynyń GLP standarty talaptaryna sáıkes júrgiziletinin, tıisti zerthanalyq praktıka normalary men qaǵıdattaryn qadaǵalaýdyń qamtamasyz etilgenin atap ótti. Álemniń kóptegen elinde GLP sapa men qaýipsizdiktiń mindetti standarty bolyp sanalady. Al Ulttyq ortalyq eń úzdik zerthanalyq praktıkany engizýge jáne qoldaýǵa tyrysady, óıtkeni máseleniń máni – turǵylyqty halyq densaýlyǵynyń qaýipsizdigine tireledi», dedi E.Dáýitbaev.
DZSUO Farmakologııalyq synaqtar zerthanasynyń quzyretine Qazaqstandaǵy birden-bir farmakokınetıkalyq jáne bıobalamalylyq zertteýlerin júrgizý kiredi. Al akkredıtasııany rastaý osyǵan uqsas zertteýler júrgizý úshin GLP OECD talaptaryna tolyq sáıkestigine jáne onyń nátıjeleriniń sapasyna kepildik berýdi bildiredi. Osy zerthanada COVID-19 dertine qarsy eki otandyq vaksınanyń klınıkaǵa deıingi synaqtarynyń II fazasy ótkenin aıta ketelik.
