Ábdisattar Smanov pen Ábdiǵappar Shákirulynyń rýhyna arnalǵan «Din rýhanııatynyń ulaǵatty ustazdary» ǵylymı-tanymdyq konferensııasyna QMDB Tóraǵasy, Bas múftı Naýryzbaı qajy Taǵanuly, О́zbekstan musylmandary dinı basqarmasynyń tóraǵasy Ýsmanhan Alımov, Qyrǵyzstan múftıiniń mindetin atqarýshy Joroboı qajy Sherǵazyev, QMDB Tóraǵasynyń orynbasary, naıb múftı Ershat Aǵybaıuly, Apparat basshysy Ǵylymbek Jádigeruly, QMDB Ǵulamalar keńesiniń músheleri, oblystyń bas ımamdary men medrese dırektorlary qatysty.
Alqaly jıyn aldymen Smanovtar áýletinen dúnıeden ótken jandardyń rýhyna Qasıetti Quran aıattaryn oqýmen bastaldy. Quran duǵasy jasalyp, Ábdisattar men Ábdiǵappar ustazdardyń din rýhanııaty jolynda atqarǵan eńbegine toqtalǵan qysqasha beınerolık usynyldy.
Konferensııa barysynda QMDB Tóraǵasy, Bas múftı Naýryzbaı qajy Taǵanuly baıandama jasap, din ǵulamalarynyń maǵynaly ǵumyryna toqtaldy.
«Dástúrimizben bite qaınasatyn musylmandyq sıpat sóz bolǵanda ońtústik ólke nazardan tys qalmaıdy. Qazaqtyń baıtaq dalasy, onyń ishinde Saryaǵash jurtyna aty máshhúr qos birdeı din janashyry Ábdisattar, Ábdiǵappar Shákiruldary týraly kóp aıtýǵa bolady. Elimizdegi dinı bilim beretin medreseler týraly aıtylǵanda alǵash «Saryaǵash medresesi» eske túsedi. Al «Saryaǵash medresesi» týraly aıtylǵanda Smanovtar áýleti alda turady. Osy medresege Ábdisattar aǵamyz ózi basshylyq etip, kelgen jastardyń dinı saýatyn ashyp qana qoımaı, olardy maman etip daıyndaýǵa kúsh saldy.
Paıǵambarymyz Muhammed (oǵan Allanyń salaýaty men sálemi bolsyn): «Senderdiń eń jaqsylaryń – Qurandy úırenip ony úıretkenderiń» degen ósıetine amal etti. Sonymen qatar Ábdisattar Smanov qasıetti Quran Kárimniń qazaq tilindegi aýdarmasyn jasap, birqatar ǵylymı eńbekterdiń avtory atandy. Qazirgi tańda úlken bir pármendi ınstıtýtqa aınalǵan Ǵulamalar keńesiniń qurylǵan jyldarynda múshe bop, alǵashqy pátýalardy qabyldaýda ǵalym retinde úlesin qosty. Jyldar boıy medrese qabyrǵasynda kóptegen shákirt tárbıeledi» deı kele Bas múftı Naýryzbaı qajy Taǵanuly alqaly jıynǵa arqaý bolǵan ulaǵatty ustazdardyń din men rýhanııat jolynda atqarǵan eńbegine erekshe toqtaldy.
Sonymen qatar halyqaralyq ǵylymı-tanymdyq konferensııasyna arnaıy kelgen О́zbekstan musylmandary dinı basqarmasynyń tóraǵasy Ýsmanhan Alımov pen Qyrǵyzstan múftıiniń mindetin atqarýshy Joroboı qajy Sherǵazyev alqaly jıynnyń mańyzyna toqtalyp, ǵalymnyń Alla aldyndaǵy dárejesi jaıynda nasıhatyn jetkizdi.
