Túlkibas aýdandyq polısııa bólimine Shymkent qalasynyń turǵyny aryzdandy. Batys Qytaı – Batys Eýropa tasjolyndaǵy gaz quıý beketinde jumys isteıtin aryzdanýshyny tańǵy saǵat 04:30 shamasynda ózine tanys emes jas jigit tonap ketken. Iаǵnı, Mercedes-Benz W124 kóliginiń júrgizýshisi gaz quıýǵa arnalǵan eki qurylǵysyn ashyqtan-ashyq tartyp alyp, oqıǵa ornynan boı tasalaǵan.
Atalǵan jaıt QR QK-niń 191-baby (Tonaý) boıynsha tirkeýge alyndy. Habarlama alysymen oryn alǵan qylmysty ashyp, kúdiktini anyqtaý maqsatynda jedel-tergeý toby oqıǵa ornyna shyqty.
Ýchaskelik polısııa ınspektorlary izdestirýge atsalysty. Polıseıler oqıǵa ornyn tyńǵylyqty tekserip, kýálardan surastyryp, jaqyn aralyqtaǵy aýmaqtardy kórip shyqty. Jan-jaqty, júıeli júrgizilgen sharalar nátıjesinde, táýlik ishinde kúdiktiniń jeke basy anyqtalyp, ol turǵylyqty mekenjaıynan ustaldy.
Polısııaǵa jetkizilgen Túrkistan qalasynyń turǵyny óz kinásin moıyndady.
