Sýretti túsirgen Erlan OMAR, «EQ»
Oblystyq sanıtarlyq-epıdemıologııalyq baqylaý departamentiniń basshysy Mádenıet Tanaýovtyń deregine súıensek, qaýipti vırýsqa shaldyqqan adamdardyń jas ereksheligin ártúrli deýge bolady. Máselen, 25 shildede koronavırýs ınfeksııasyn juqtyrǵan 61 adamnyń arasynda 49 eresek turǵyn, 14 jasqa deıingi 12 jasóspirim bar. Al keshe 68 adamnan COVID-19 belgisi anyqtaldy. Atap aıtqanda, Atyraý qalasynda – 55, Qyzylqoǵa aýdanynda – 5, Mahambette – 4, Jylyoıda – 3, Qurmanǵazy aýdanynda 1 adam «jaman» tumaýdyń shyrmaýyna ilinip otyr.
– Qazir koronavırýs ınfeksııasyna shaldyqqan 600 adam óz úıinde em-dom qabyldap jatyr. Al №2 oblystyq aýrýhananyń ınfeksııalyq stasıonarynda 52, aýdandardaǵy ınfeksııalyq stasıonarlarda 14 naýqas em alý úshin oqshaýlandy. Shilde aıynyń 18-24 kúnderi 322 adamnan koronavırýs ınfeksııasy rastaldy. Demek, bul derek 100 myń turǵynǵa shaqqandaǵy kórsetkishtiń 48,3 jaǵdaıyn qurady. О́tken aptadaǵy kórsetkishpen salystyrǵanda qaýipti vırýsqa shaldyǵý eki esege ósip otyr. Alaıda qyrkúıek aıynda bul kórsetkish 10 ese kóbeıip, táýligine 600-800 adamnan koronavırýs ınfeksııasy anyqtalýy múmkin degen boljam bar, – dedi M.Tanaýov.
Al oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, turǵyndar arasynda vaksınalaý men revaksınalaý qarqyny tómendegeni baıqalady. Atyraý oblysynda vaksına alatyndar tizimine 365 760 adam engizilgen.
– Sońǵy alty aıda vaksınanyń birinshi komponentin alǵandardyń sany 2,4 ese tómendep otyr. Vaksınanyń ekinshi komponentin saldyrǵandar qatary 3,1 ese azaıǵan. Al revaksınalaýdan ótetinder sanatyna jatatyn adamdar sany – 250 601. Biraq bıylǵy birinshi jartyjyldyqta revaksınalaý kórsetkishi 1,1 ese tómendedi. Qazir ınfeksııalyq stasıonarlarda em alyp jatqan naýqastardyń 80 paıyzy – vaksına almaǵan adamdar. Sondyqtan osyndaı adamdardyń arasynda qaýipti vırýsty juqtyrý kórsetkishi kóbeıip tur, – deıdi A.Baıdýálıev.
Oblystyq densaýlyq basqarmasy baspasóz qyzmetiniń málimetinshe, 27 shildedegi derekke sáıkes vaksınalardyń birinshi komponentin 272 943 adam ektirgen. Vaksınalardyń ekinshi komponentin 259 447 atyraýlyq saldyrǵan. Qaıta vaksınalaýdan 101 270 adam ótken. Pfizer ekpesiniń birinshi komponentin 18 374, ekinshi komponentin 14 804 adam alǵany belgili bolyp otyr. Dál osy vaksınany qaıtalap saldyrǵandar sany 37 979 adamdy qurady.
Atyraý qalasyndaǵy №7 emhanada eki vaksına pýnkti bar. Onyń biri emhanada, ekinshisi «Dına» saýda ortalyǵynda ornalasqan. Emhana dırektorynyń orynbasary Nurbaqyt Kópjanovtyń aıtýynsha, osy kezge deıin atalǵan pýnktterde vaksınanyń tolyq komponentin 14 702 adam saldyrǵan. Al revaksınalaýdan 5 702 adam ótken.
– Bizdiń emhananyń qoımasynda vaksınalardyń 1 671 dozasy saqtaýly tur. Tamyz aıynda vaksınany taǵy da alǵaly otyrmyz. Emhana pýnktterinde vaksına saldyrý qarqyny údeı tústi. Máselen, 25 shildede 173 adam vaksına saldyrdy. Buǵan qalaǵa stýdentter men talapkerlerdiń kóp kelýi, turǵyndardyń shetelge demalysqa barýǵa daıyndalýy sebep bolyp otyr, – deıdi Nurbaqyt Kópjanov.
Atyraý oblysy
