Jıynda elimizdiń sport salasyna jaýapty basshylar qazaqstandyq sportshylardyń iri halyqaralyq jarystardaǵy aralyq nátıjelerin, olardy daıarlaý júıesindegi ózgeristerdi, medısınalyq-bıologııalyq qamtamasyz etý jáne dopıngke qarsy baǵdarlamalardy, sondaı-aq óńirlerde olımpıadalyq sport túrleriniń jaı-kúıi men damýyna qatysty máseleler baıandaldy.
Alqaly otyrysta sóz alǵan Dáýren Abaev Olımpıadaǵa qatysýǵa múmkindik beretin lısenzııalar sanyna emes, medaldardyń sapasyna nazar aýdarý qajet ekenin aıtty. Sebebi kez kelgen jarystyń jalpykomandalyq esebi altyn medal sanyna qarap júrgiziletini belgili. Sondaı-aq mınıstr federasııa basshylary men jattyqtyrýshylarǵa birqatar tapsyrma berdi. Máselen, endigi kezekte qurama komandalarǵa jastardy tartý arqyly jasartý jáne halyqaralyq jarystarǵa irikteýdi barynsha ashyq ótkizý boıynsha jumysty belsendi júrgizý qajet ekenin jetkizdi.
«El sportyn damytý úshin bıýdjetten qomaqty qarajat bólinip, qoldaý kórsetilýde. Qajetti jaǵdaılar jasalyp jatyr. Degenmen mınıstrlik qaıyrymdylyqpen aınalyspaıdy. Sondyqtan erteń jumsalǵan ár tıynnyń suraýy bolady. Muny osynda otyrǵan árqaısyńyz este saqtaýǵa tıissizder. Sporttaǵy joǵary jetistikter naqty nátıjelerge negizdeledi, qalǵany – dene shynyqtyrý. Sondyqtan bizge jańa jeńister kerek», dedi Dáýren Abaev.
Sportty damytý dıreksııasynyń dırektory Oralbaı Jaqsymbetov Parıjde 329 medal jıyntyǵy oınalatynyn aıtty (Tokıoda 339 medal jıyntyǵy oınalǵan edi). Aıta keteıik, elimizdiń qurama komandalary osy jyldyń basynan beri 19 álem chempıonatyna jáne 20 Azııa chempıonatyna qatysyp, 140 medal jeńip aldy: onyń ishinde 35 altyn, 40 kúmis, 65 qola bar. 2022 jyldyń sońyna deıin bizdiń sportshylar taǵy 3 álem chempıonatyna jáne 3 Azııa chempıonatyna qatysady.
Úsh jarym saǵatqa sozylǵan jıynda Sporttyq medısına jáne ońaltý ortalyǵynyń dırektory Azamat Nurmatov, Ulttyq dopıngke qarsy ortalyqtyń dırektory Maıra Baqasheva, sport basqarmalarynyń basshylary, sport túrleri boıynsha federasııa ókilderi jáne basqa da jaýapty tulǵalar jumys nátıjeleri týraly baıandady.
«Qurama komanda qataryna sportshylardy irikteý rásimderiniń ashyq ótýi mańyzdy. Bul bizdiń basty nazarymyzda bolady. Aldaǵy ýaqytta mınıstrlik sportshylardyń barlyq jetistigin, jarystarǵa qatysý kestesin baqylaýǵa múmkindik beretin e-sport júıesin iske qosady. Ádilettilik pen ashyqtyq mańyzdy, sport júıesinde salamatty básekelestik bolýǵa tıis», dedi Dáýren Abaev.
Mınıstr sport basqarmalarynyń basshylaryna olımpıadalyq sport túrleriniń basymdyǵyn eskere otyryp, joǵary sport sheberligi mektepteriniń jumys isteý qaǵıdattary men tásilderin qaıta qaraý, federasııalarmen birlesip sport rezervin daıyndaýdyń biryńǵaı standartyn jáne oqytý baǵdarlamalaryn ázirleýdi tapsyrdy.
