Gir kóterý 1985 jyly resmı sport túri bolyp bekitilgenimen, ony eshbir sport túri óz quramyna engizgen joq. Sóıtip, 2007 jyly Shyǵys Eýropanyń bes memleketi – Estonııa, Lıtva, Reseı, Ýkraına jáne Belarýs bas qosyp, Halyqaralyq gir sporty odaǵyn qurdy. Sóıtip, álemniń 63 elin óz músheligine qabyldaǵan atalǵan uıym 2010 jyldan bastap gir kóterýden álem chempıonatyn uıymdastyra bastady. Jyl saıyn turaqty túrde ótkiziletin álemdik dodanyń 2016 jylǵy básekesi Qazaqstannyń Aqtóbe qalasynda uıymdastyrylǵanyn da aıta keteıik.
Jalpy, sporttyń qaı túrin alyp qarasańyz da báriniń maqsaty salamatty ómir saltyn ustaný, áýesqoı jáne kásibı deńgeıde jetistikke jetý, túrli jarystarǵa qatysý ekeni belgili. Degenmen táýir nátıjege qol jetkizip, chempıonattarda top jarý kez kelgen sportshyǵa buıyra bermeıdi. Mundaı jetistikke tek qajyrly eńbek etip, sportty sheksiz súıip, kez kelgen qıyndyqqa moıymaı, tek alǵa qaraı umtylatyn jandar ǵana jetedi.
Osy sportta baǵy janyp, baby kelisken, gir kóterýden sport sheberi, eki dúrkin Azııa chempıony, áskerı qyzmetshi, maıor Ádilhan Nurǵazınniń sporttyq ǵumyry kóp janǵa úlgi bolarlyqtaı.
Shyǵys Qazaqstan oblysynyń Kúrshim aýdanynda dúnıege kelgen Ádilhan Nurǵazın bozbala kúninen sportty janyna serik etken. 1992 jyly kásibı-tehnıkalyq ýchılıshege oqýǵa túsken ol alǵashynda kúrespen aınalysa bastaǵan. Keıinnen gir kóterýge zeıin qoıyp, atalǵan sporttyń qyr-syryna qanyǵady. Keıipkerimiz nebári eki jyldyń ishinde gir kóterýden Qazaqstan chempıony atandy. 1994 jyly alǵash ret jastar arasynda uıymdastyrylǵan el birinshiliginde ol 24 kılo gir tasyn serpe kóterý jattyǵýynda 80 ret, julqa kóterý baǵdarlamasynda 85 ret kóterip, altynnan alqa taqty.
Aýylda ósken jigittiń eńbekqorlyǵy sportta talaı synaldy. Sport sheberine kandıdat ataǵyn alý úshin de biraz ter tókti. 1995 jyldyń kúzinde Qazaqstan chempıonatyna irikteý úshin ótip jatqan oblystyq jarysta 40 ret serpe, 40 ret julqa kóterip, sport sheberine kandıdat atandy. Ádilhannyń qaı jarysqa barsa da qorjyny bos qaıtpaıtyn.
1997 jyly eki jyl ásker qatarynda Otan aldyndaǵy boryshyn abyroımen ótep, úıine oralady. «1999 jyly áskerden kelgenimde sport sheberi, respýblıkanyń eńbek sińirgen jattyqtyrýshysy Ádilbek Baımuhambetovti kezdestirdim, ol Kúrshimde ótip jatqan aýdandyq jarysqa shyǵardy. Jarystan birinshi oryn alyp, artynsha oblystyq dodaǵa da qatystym. 2000 jyly kópten armandaǵan sport sheberi ataǵyna da qol jetkizip, eresekter arasynda Qazaqstan chempıony boldym», deıdi áskerı sportshy.
2001 jyly Ahmırdegi áskerı bólimge kelisimshart boıynsha áskerı qyzmet etýge keledi. Ádilhannyń sportqa degen erekshe yqylasyn baıqaǵan basshylyq ony Úsharaldaǵy Áýe qorǵanysy kúshteriniń avıabazasyna aýystyryp, dene daıyndyǵy jáne sport basshysy laýazymyna taǵaıyndady. Áskerı qyzmette júrse de, sporttan qol úzbegen keıipkerimiz TMD-ǵa múshe elder arasyndaǵy jarystarda birneshe márte óz myqtylyǵyn dáleldedi. Atap aıtar bolsaq, 2010 jyly Peterbýrgte úshinshi, 2012 jyly Qyrǵyzstan astanasy Bishkekte ótken týrnırde ekinshi oryn ıelendi. Sonymen qatar ár jyldary uıymdastyrylǵan osyndaı halyqaralyq jarystarda da júldeli oryndardan kórinip júrdi.
2021 jyly elordaǵa qonys aýdarǵan ol Astanadaǵy jattyqtyrýshysy Serik Ábdiaqınmen birge Bishkekte uıymdastyrylǵan Azııa chempıonatyna qatysyp, alǵash ret Sary qurlyq básekesinde daralandy. Jerlesimiz 32 kılolyq gir tasyn serpe jáne julqa kóterýde barlyq qarsylasynan oq boıy uzap, 165 upaımen úzdik shyqty. Sondaı-aq bıyl sáýirde Shýchınskide 40 jasqa deıingi ardagerler arasynda ótkizilgen Azııa birinshiliginde baq synap, qatarynan ekinshi márte tuǵyrdyń eń bıik satysynan kórindi.
Otbasynda úsh ul, bir qyz tárbıelep otyrǵan áskerı sportshy búginde shákirt tárbıeleýdi qolǵa alǵan. Ádilhan Nurǵazın qazir gir kóterý sportynan bólek, áskerılengen kross, ofıserlik úshsaıys syndy basqa da sport túrlerinen shákirt daıarlap júr. Jas jetkinshektermen qatar, sarbazdardy da sportqa baýlyp, olardy elishilik jáne sheteldik jarystarǵa da qatystyryp keledi. Jýyrda Úndistanda ótken dúbirli dodada shákirti Erbol Daıyrbaımen birge ózi de baq synap, ekeýi de altyn tuǵyrdan kórinip, álem chempıony atandy.
