Sportty damytý dıreksııasynyń baspasóz qyzmeti, muhıttyń arǵy betindegi dodada Qazaqstan quramasynan eki ókil baq synaıtynyn málimdedi. Atap aıtar bolsaq, qyzdar arasyndaǵy 72 kıloǵa deıingi salmaqtaǵy álem reıtınginiń kóshbasshysy Jámıla Baqbergenova men erler arasyndaǵy bıylǵy Azııa birinshiliginiń jeńimpazy Azamat Dáýletbekov (86 kılo) álem quramasy sapynda kúresedi. Ár eldiń tańdaýly bozkilem sheberlerinen jasaqtalǵan komanda V tobynda AQSh jáne Qytaı quramalarymen jartylaı fınal joldamasyn sarapqa salady. Al A tobynda Japonııa, Ýkraına men Mońǵolııanyń burymdy balýandary ózara kúsh synasady.
Qytaı quramasy 72 kıloǵa deıingi salmaqta bir ǵana balýan – Sıan Degenchagandy jarysqa qatystyrmaq (UWW reıtınginde ol 12-orynda tur). Jarys qojaıyny AQSh qyrkúıekte Belgradta álem chempıony atanǵan Amıt Elor men Skaılar Ellıson Groteni tańdapty. Aıta keteıik, Serbııa astanasynda Jámıla fınalda dál osy Amıt Elorǵa ese jiberip, kúmis júldege ıe bolǵan edi.
Jámıla bıyl Halyqaralyq kúres federasııasy (UWW) bekitken barlyq salmaqtaǵy álemdik reıtıngti (72 kıloǵa deıingi salmaqta) 1-orynmen aıaqtaıtyny barshaǵa málim. Onyń enshisinde 52 000 upaı bar. UWW erejesi boıynsha, jyldy birinshi orynmen qorytyndylaǵany úshin oǵan Halyqaralyq kúres federasııasy 5000 AQSh dollary kóleminde syıaqy beredi. Jámıla bıyl birqatar tolaıym tabysqa qol jetkizdi. Máselen, ol álem chempıonatynda moınyna kúmis júldeni ilgen bolsa, Azııa birinshiliginde altynnan alqa taqty. Sondaı-aq Bolat Turlyhanov atyndaǵy Gran-prı jarysynda da dara shyqty. Al Islam oıyndary saıysynda qola júldeni qanaǵat tutty.
Al otandasymyzdyń basty qarsylasy – Amıt bir jylda jastar, 23 jasqa deıingiler jáne eresekter arasynda álem chempıonatynda top jarǵan birinshi amerıkalyq balýan ekenin atap óteıik.
Álem kýboginde otandasymyzǵa kimder qarsylas atanbaq? Mońǵolııa osy salmaqtaǵy betkeustary Davaanasan Enh Amar men Sarnaı Baıarbaatardyń jolyna úmitpen qaraıdy. Ýkraına da óz kóshbasshysy Anastasııa Alpeevaǵa senim artady. Ol qazir reıtıngte 13-satyda tur. 21 jastaǵy balýan bıyl Ispanııada 23 jasqa deıingiler arasyndaǵy álem chempıonatynda qolaǵa qol jetkizgen.
Bir qyzyǵy, Japonııa bul salmaqta eshkimdi aparmaıdy. Bapkerler Oslodaǵy álem chempıonatynyń jeńimpazy Masako Fýrýıchıǵa da, basqa sportshylaryna da demalys berýdi jón sanapty.
Aıta keteıik, Álem kýbogin jyl saıyn Halyqaralyq kúres federasııasy (United World Wrestling) uıymdastyrady. Munda álem chempıonatynda jalpy esepte úzdik shyqqan 5 qurama men álem quramasy (ózge quramalardaǵy úzdik balýandardan jasaqtalǵan) kúsh synasady.
Qazaqstandyq kúres jankúıerleri Koralvıll qalasyndaǵy tartysty beldesýlerdi Halyqaralyq kúres federasııasynyń (United World Wrestling) resmı saıtynyń tikeleı efırinen kóre alady.
