Atap aıtar bolsaq, jýyrda Nıderlandtyń Assen qalasynda sporttyq bı jarysynan kezekti álem chempıonaty uıymdastyryldy. Sol dodada qazaqstandyq Arman Tólepbergenov pen Zerip Mádıqyzy juby óner kórsetip, «qyzǵaldaqtar elinen» kúmis júldemen oraldy. Bul – elordalyq jas jetkinshekterdiń álem birinshiligindegi alǵashqy júldesi. Arman – sporttyq bımen jeti jasynan bastap aınalyssa, Zerip alǵash ret 4 jasynda sporttyq bıdiń álippesimen tanysqan. Qazirgi tańda olar elordadaǵy starlight Balance sporttyq bı klýbynda jattyǵady.
Qazaqstandyq jáne reseılik bilikti bapkerler – Ekaterına Rybına, Rýslan jáne Valerııa Aıdaevtardan tálim alatyn jerlesterimiz búginge deıin birtalaı jarysta óz myqtylyǵyn dáleldep úlgerdi. Olar Astana, Almaty, Shymkent, Taraz, Qaraǵandy, Kókshetaý qalalarynda uıymdastyrylǵan elishilik dodalarda birneshe ret top jarǵan bolsa, Reseıdiń Máskeý, Sankt-Peterbýrg qalalarynda, Bolgarııada ótken halyqaralyq jarystardyń birneshe dúrkin júldegeri atanǵan.
