«Qazir respýblıkada 15 myń mal dárigeri jumys isteıdi. Ázirge 500 maman tapshy bolyp tur», dedi Asqar Jaqypbaev Aýyl sharýashylyǵy mınıstrligi alqasynyń keńeıtilgen otyrysynda.
Onyń aıtýynsha, ótken jyly Úkimet rezervinen veterınarlardyń jalaqysyn kóterýge qarajat bólingen.
«Bizde veterınarlar jetispeıdi. Búgingi tańda aýyl sharýashylyǵynda eń tómengi jalaqy veterınarlar arasynda. Bıýdjetten jáne Úkimet rezervinen 6,1 mlrd teńge bólingen. Sonymen qatar jergilikti ákimdikter tarapynan qarjy bólinip, osy sharalardyń arqasynda eńbekaqy 50%-ǵa ósti. Bıyl ony 35%-50%-ǵa kóterý josparda bar», dedi Asqar Jaqypbaev.
