«Jastar rýhynyń» tóraǵasy Nurjan Jetpisbaev bir aptaǵa jeter-jetpes ýaqytta 3 myńnan astam ótinim kelip túskenin atap ótti.
«Sabaq aptasyna bir ret ótkiziledi. Al biz bul klýbtardyń jumysyn úılestiremiz. Qazaq tilin meńgergisi keletin adamdardyń bárine birdeı múmkindik berý qajet. Partııanyń saıası tuǵyrnamasynda jazylǵandaı, tilimizdiń mártebeli jáne qajetti qatynas quralyna aınalýyna tikeleı múddelimiz. Til úırený – tıimdi ári qol jetimdi bolýy kerek. Memlekettik til qazaq qoǵamyn biriktiretin kúshke aınalýǵa tıis», dedi ol.
Uıymdastyrýshylardyń aıtýynsha, til úırenýshilerge jaı ǵana ynta tanytqan muǵalimder emes, jańashyl ádisterdi meńgergen mamandar sabaq beredi.
«Tildi tıimdi ádis boıynsha úıretemiz. Biz tek sabaq ótkizip qana qoımaı, teatr, qazaq fılmderiniń kórsetilimi syndy mádenı oryndarda ulttyq mádenıetpen tanystyrýdy kózdeıtin túrli is-shara uıymdastyramyz. Qatysýshylarymyz til úırenip qana qoımaı, qoǵamdastyǵymyzdyń bir múshesi bolǵanyn qalaımyz. Qatarymyzǵa barynsha kóp adam qosylyp, qazaq tilin úırenýshilerdiń sany artsa eken deımiz», dedi Iаkov Fedorov esimdi belgili bloger.
Klýb otyrysy «Jastar rýhynyń» Astana, Almaty qalalarynda jáne Abaı, Aqmola, Aqtóbe, Almaty, Shyǵys Qazaqstan, Batys Qazaqstan, Qaraǵandy, Qostanaı, Pavlodar, Soltústik Qazaqstan oblystaryndaǵy fılıaldarynda ótedi.
