«Turǵyn úı qurylysy salasynda kóptegen máseleler jınaqtaldy. Injenerlik ınfraqurylymnyń jetispeýine baılanysty ákimdik turǵyn úı qurylysynyń qarqynyn birtindep tómendetýdi usynady. Sonymen qatar elordada týý deńgeıi joǵary, kóshi-qon aǵyny artty. Qurylys qarqyny tómendegen kezde 30 myńǵa jýyq adam jumyssyz qalýy múmkin. Mundaı problemalar týyndaǵan joq. Biraq qalanyń damýyn júıeli josparlaý qajet. Bul máselede, ókinishke qaraı, eleýli olqylyqtar seziledi», dedi Prezıdent.
Budan soń, ol elordany qajetti ınjenerlik ınfraqurylymmen qamtamasyz etý týraly aıtty.
«Barlyq salynyp jatqan nysandarda zamanaýı energııa únemdeý tehnologııalaryn qoldaný qajet. Tórt myńǵa jýyq úleskerdiń problemasy kún tártibinen túspeı tur. Zańnamalyq bazanyń álsizdigine baılanysty qalada jańa problemalyq nysandar paıda bolýy múmkin», dedi Memleket basshysy.
Osy rette ol qazir Astanada ruqsat qujattarynsyz 90-nan astam turǵyn úı kesheni salynyp jatqanyn aıtyp ótti. Qurylys kompanııalary az ǵana aıyppul tóleıdi. Olar azamattardyń qarajatyn tartýdy jalǵastyryp jatyr.
«Úkimet memlekettik retteý sharalaryn qatańdatýy kerek. Qurylys salýshylardyń zańnamany aınalyp ótý úshin úleskerlerdiń qarajatyn tartýyna jol bermeý kerek. Bul jumysqa Qarjy monıtorıngi agenttigi qosylýy tıis», dedi Q.Toqaev.
